ބޮލީވުޑްގެ މަޝްހޫރު ލަވަކިޔުންތެރިޔާ ޔޯޔޯ ހަނީ ސިންގްގެ ދިރިއުޅުމުގެ ވާހަކަ ކިޔައިދޭ ޑޮކިއުމެންޓަރީ ފިލްމެއް މިމަހުގެ 20 ވަނަ ދުވަހު ނެޓްފްލިކްސްގައި ޕްރިމިއާ ކުރާނެ ކަމަށް ރިޕޯޓްތައް ބުނެފިއެވެ.

"ޔޯޔޯ ހަނީ ސިންގް: ފޭމަސް" ގެ ނަމުގައި ނެރޭ މި ޑޮކިއުމެންޓަރީގައި އިންޑިއާގެ އެންމެ މަޝްހޫރު ރެޕަރުންގެ ތެރޭގައި ހިމެނޭ ޔޯޔޯގެ ޙަޔާތުގެ ގިނަ ޞަފްޙާތަކެއް ދައްކުވައިދޭނެ ކަމަށް ލަފާކުރެވެއެވެ. ގުނީތު މޮންގާ ޕްރޮޑިއުސްކޮށްފައިވާ މި ފިލްމުގެ ޑައިރެކްޓަރަކީ މޮޒެޒް ސިންގްއެވެ.

މިހާތަނަށް މަޤުބޫލު އެތައް ލަވައެއް ކިޔައި، ގިނަ ޢަދަދެއްގެ ވީޑިއޯ ލަވަ ވެސް ނެރެފައިވާ ޔޯޔޯއަކީ ބޮލީވުޑްގެ ވަރަށް ގިނަ ފިލްމުތަކަށް ވެސް މިއުޒިކް ހަދައި ލަވަކިޔާފައިވާ ފަންނާނެކެވެ. އެގޮތުން މަޝްހޫރު އެތައް ތަރިންނެއްގެ ފިލްމުތަކަށް ޔޯޔޯ ލަވަ ކިޔާފައިވެއެވެ.

މީގެ އިތުރުން، ޔޯޔޯ ވަނީ ތިން ހަތަރު ފިލްމެއްގައި އެކްޓްކޮށްފައެވެ. އޭގެ ތެރެއިން އެންމެ ފާހަގަކޮށްލެވޭ ފިލްމަކީ މިއުޒިކް ޑައިރެކްޓަރު އަދި ލަވަކިޔުންތެރިޔާ ހިމޭޝް ރޭޝަމިއާ އެކީ ކުޅުނު 2014 ގެ "ދި އެކްސްޕޯސް" އެވެ.

މިއުޒިކީ ދާއިރާގައި ޔޯޔޯ ވަރަށް ކާމިޔާބު ވީ ނަމަވެސް، އަމިއްލަ ޒާތީ ދިރިއުޅުމުގައި އޭނައަކީ ވަރަށް ގިނަ ކަންތައްތަކާ ކުރިމަތިލާން ޖެހުނު މީހެކެވެ. އެގޮތުން ރަލާއި މަސްތުވާތަކެއްޗަށް އެޑިކްޓްވެ، ގިނަ ދުވަސްތަކެއް ވަންދެން ރިހެބް ފަރުވާ ހޯދާފައިވެއެވެ.

މިހާރު އުމުރުން 41 އަހަރުގެ ޔޯޔޯގެ ކައިވެނި ވެސް ވަނީ 2022 ގައި ރޫޅިފައެވެ.