ސޫރިޔާގެ ރައީސް ބައްޝާރު އަލް-އަސަދުގެ ވެރިކަން ވެއްޓުމާއި ގުޅިގެން އިސްރާއީލުން ވަނީ އިތުރު ބިންތައް އިސްތިޢުމާރު ކުރުމުގެ މަސައްކަތް ފަށައިފައެވެ. އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ އަސަދުގެ ވެރިކަން ވެއްޓުނީ އިސްރާއީލުގެ ފައުޖުން އީރާނާއި ލުބުނާނުގެ ޙިޒްބުﷲ ޖަމާޢަތާއި ދެކޮޅަށް ދިން ވަރުގަދަ ޙަމަލާތަކުގެ ސަބަބުން ކަމަށެވެ.

ނަތަންޔާހޫ ވަނީ އަސަދުގެ ވެރިކަން ވެއްޓުމަކީ ތާރީޚީ ކާމިޔާބީއެއްގެ ގޮތުގައި ސިފަކުރައްވައި، އެކަމުގެ ސަބަބުން އިސްރާއީލަށް އިތުރު މަގުތަކެއް ފަހިވެފައިވާ ކަމަށް ވިދާޅުވެފައެވެ. އަދި އިސްރާއީލުގެ ފައުޖުން އިސްތިޢުމާރު ކުރި އައު ސަރަޙައްދުތަކަށް ނަތަންޔާހޫ ވަނީ ޒިޔާރަތްކުރައްވާފައެވެ.

އަސަދުގެ ވެރިކަން ވެއްޓުނު ދަނޑިވަޅާއި ދިމާކޮށް އިސްރާއީލުގެ ފައުޖުން ވަނީ ސޫރިޔާގެ ވެރިރަށް ދިމިޝްޤަށް ބޮން އަޅާފައެވެ. އިތުބާރުހުރި މަސްދަރުތަކުން ބުނެފައިވާ ގޮތުގައި މި ޙަމަލާތައް އަމާޒުކޮށްފައި ވަނީ ސޫރިޔާގެ އަސްކަރިއްޔާއިން ދޫކޮށްލާފައިވާ މިސައިލުތަކާއި ރޮކެޓުތައް ހަނގުރާމަވެރި ޖަމާޢަތެއްގެ އަތްދަށަށް ދިޔުމުގެ ކުރިން ނައްތާލުމަށެވެ.

1967 ވަނަ އަހަރު ޢަރަބިންނާއި ދެކޮޅަށް ކުރި ހަނގުރާމާގައި އިސްރާއީލުން ވަނީ ސޫރިޔާގެ ޖޫލާނުގެ އުސް ބިންތައް އިސްތިޢުމާރުކޮށްފައެވެ. އަދި އަސަދުގެ ވެރިކަން ވެއްޓުމާއި ގުޅިގެން އިސްރާއީލުގެ ފައުޖުން ވަނީ ސޫރިޔާގެ ސަރަޙައްދީ ރޮނގުގެ އިން ފަހަތަށް ޖައްސައި އިތުރު ސަރަޙައްދަކަށް އަތްގަދަކޮށްފައެވެ.

^{އަސަދުގެ ވެރިކަން ވެއްޓުމާއެކު އިސްރާއީލްގެ ޓޭންކަރުތަކުން ސީރިއާގެ ބޯޑަރާއި ކައިރިއަށް ޓޭންކުތައް ޖަމާކޮށްފައި}

އިސްރާއީލުގެ ބޮޑުވަޒީރު ވަނީ 1974 ވަނަ އަހަރު ސީރިއާއާ އެކު ވެފައިވާ ޑިސެންގޭޖްމަންޓް އެއްބަސްވުން "ފުނޑުފުނޑުވެފައިވާ" ކަމަށް ވިދާޅުވެ ގޯލާން އުސްމިނުގައި ޑިމިލިޓަރައިޒްޑް ބަފަރ ޒޯނެއްގެ ކޮންޓްރޯލް ވަގުތީ ގޮތުން ހިފެހެއްޓިކަން އިއުލާން ކުރައްވާފައެވެ.

ބެންޖަމިން ނަތަންޔާހޫ ވިދާޅުވީ އިސްރާއީލުން ހިފާފައިވާ ގޯލާންގެ ބަފަރު ޒޯނާއި "ކައިރީގައި ހުންނަ ކޮމާންޑިން ޕޮޒިޝަންތަކަށް" ވަނުމަށް އިސްރާއީލުގެ ޑިފެންސް ފޯސަސް (އައިޑީއެފް) އަށް މިހާރު އަންގަވާފައިވާ ކަމަށެވެ.