ދާޚިލީ ސަލާމަތާއި ފަންނިއްޔަތާ ބެހޭ ވުޒާރާގެ މަސައްކަތްތައް މިހާރު ހިނގަމުންދަނީ ރައްޔިތުންގެ ރައްކާތެރިކަން ކަށަވަރުކުރެވޭ ގޮތަށް ކަމަށް ވަޒީރު އަލީ އިހުސާން ވިދާޅުވެއްޖެއެވެ.
ވަޒީރު މިހެން ވިދާޅުވީ 37 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތުގައި ވާހަކަދައްކަވަމުންނެވެ.
އައްޑޫސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެން ލޯ އެންފޯސްމަންޓުގައި މިރޭ ބޭއްވި އެ ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ އެ ވުޒާރާގެ މަސައްކަތްތައް ހިނގަމުންދަނީ ނަތީޖާ ނެރޭ އަދި ރައްޔިތުންގެ ރައްކާތެރިކަން ކަށަވަރުކުރެވޭ ގޮތަށް ކަމަށެވެ.
Advertisement
ވަޒީރު ވިދާޅުވީ ފުލުހުންގެ ޚިދުމަތުން މިވީ އެއް އަހަރު ތެރޭގައި ގިނަ ކާމިޔާބީތައް ޙާޞިލްކޮށްފައިވާއިރު، އެއަށް ވުރެ ބޮޑު ކާމިޔާބީތަކެއް ޙާޞިލްކުރުމަށް މަސައްކަތް ކުރުމަށް އަޒުމް ކަނޑައަޅަން ޖެހޭ ކަމަށެވެ. އަދި އެ ވުޒާރާއަކީ އެފަދަ މަސައްކަތްތަކުން ނަތީޖާ ނެރެވޭ ގޮތަށް އެކުލަވާލާފައިވާ ވުޒާރާއެއް ކަމަށް ވަޒީރު ވިދާޅުވިއެވެ.
މަސްތުވާތަކެއްޗާ ދެކޮޅަށް ވެސް ވަރުގަދަ މަސައްކަތްތަކެއް ކުރެވެމުންދާ ކަމަށާއި މަސްތުވާތެކެތި ހުއްޓުވުމަށް ގިނަ މަސައްކަތްތަކެއް ކުރެވިފައިވާކަން ވަޒީރު ވަނީ ފާހަގަކުރައްވާފައެވެ. އެގޮތުން ނިމިދިޔަ އަހަރެއްހާ ދުވަހުގެ ތެރޭގައި 1.3 ބިލިއަން ރުފިޔާގެ މަސްތުވާތަކެތި މުޖުތަމަޢުގެ ތެރެއަށް ދައުރުވިޔަ ނުދީ ހުއްޓުވާފައި ވާކަމަށް ވަޒީރު ވަނީ ވިދާޅުވެފައެވެ.
މީގެ އިތުރުން ފުލުހުންގެ މަސައްކަތްތައް އިތުރަށް ހަރުދަނާކުރުމަށްޓަކައި އިންޑިއާ ސަރުކާރުގެ އެހީގައި އައްޑޫގައި ތަރައްޤީކޮށްފައިވާ ފުލުހުންގެ ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމެންޓުގެ މަރާމާތުގެ މަސައްކަތަށް އިންޑިއާ ސަރުކާރުން 130.9 މިލިޔަން ރުފިޔާ ނުވަތަ 8.5 މިލިޔަން ޑޮލަރުގެ އެހީއެއް ދިނުމަށް ނިންމަވާފައިވާކަމަށް ވަޒީރު ވަނީ ވިދާޅުވެފައެވެ.
ވަޒީރު ވިދާޅުވީ އިންޑިއާއިން ދެއްވި ހިލޭ އެހީއަށް ޝުކުރު ދަންނަވާ ކަމަށާއި މި ހިލޭ އެހީން ދައްކުވައިދެނީ އިންޑިއާ ސަރުކާރާއި ދިވެހި ރައްޔިތުންނާ ދެމެދު އޮތް ޚާއްސަ ގުޅުން ކަމަށެވެ.
ފުލުހުންގެ 37 ވަނަ އަސާސީ ތަމްރީނު ކޯހުން 171 އޮފިސަރުން ދަސްވެނިވެފައިވާކަން ފާހަގަކުރައްވާ ވަޒީރު ވިދާޅުވީ ފުލުހުންގެ އަސާސީ ތަމްރީނު ފުރިހަމަ ކުރި އޮފިސަރުން ހަވާލުވަނީ ބޮޑު ޒިންމާއަކާ ކަމަށެވެ. އަދި އެ ޒިންމާ އަދާކުރުމުގައި، ނަޒާހަތްތެރިކަމާއެކު މަސައްކަތް ކުރުމަށް ވަޒީރު ވަނީ ނަސޭޙަތްތެރިވެލައްވާފައެވެ.
މިރޭގެ ރަސްމިއްޔާތުގައި ތައުލީމާއި ބެހޭ ވަޒީރު ޑރ. އިސްމާއިލް ޝަފީޢު އަދި އިންޑިއާގެ ސަރްދާރު ވައްލަބާއި ޕަޓޭލް ނޭޝަނަލް ޕޮލިސް އެކަޑަމީގެ ޑިރެކްޓަރ އަމިތު ގަރްގް ވަނީ ބައިވެރިވެވަޑައިގަންނަވާފައެވެ.
