އައްޑޫ ސިޓީއާ ފުވައްމުލަކު ސިޓީގައި ވެމްކޯއިން ކުނި ނަގާ ފީ އަށް ބަދަލުތަކެއް ގެނެސްފިއެވެ.

ވެމްކޯއިން މިއަދު ކުރި އިޢުލާނެއްގައި ބުނީ އެ ކުންފުނިން މިފަހުން ޚިދުމަތް ދޭން ފެށި ރަށްރަށުގައި އަންނަ މަހުން ފެށިގެން ފީ ނަގަން ފަށާނެ ކަމަށެވެ. އެގޮތުން ސިޓީތަކާއި ރަށްރަށުގައި އެ ކޯޕަރޭޝަނުން ފޯރުކޮށްދެމުންދާ ކުނި މެނޭޖުކުރުމުގެ ހިދުމަތްތަކަށް 1 ޖަނަވަރީ 2025 އިން ފެށިގެން ފީ ނެގުމަށާއި މިހާރުވެސް ފީ ނަގަމުންދާ ސިޓީތަކުގައި ފީ ނެގޭ އުސޫލައް ބަދަލު ގެނައުމަށް ނިންމާފައިވާ ކަމަށް ވެމްކޯއިން ބުންޏެވެ.

ވެމްކޯއިން ބުނީ އައު އުސޫލުގެ ދަށުން ގޭބިސީތަކުންނާއި، ވިޔަފާރި، އަދި ސަރުކާރުގެ މުއައްސަސާތަކުން ކުނި ނަގައި ދިނުމުގެ ޚިދުމަތަށް އަގު ނެގުމުގެ އިތުރުން، ކުނި މެނޭޖްކުރާ ސެންޓަރުތަކަށް ކުނި އުކާލާ ފަރާތްތަކުން ކުނި އުކާލުމަށް ގޭޓު ފީ އެއް ނެގިގެންދާނެ ކަމަށެވެ.

ވެމްކޯގެ ޚިދުމަތްތަކަށް ފީ ނެގުމަށް ހަމަޖެހިފައިވާ ގޮތަކީ:

ވެމްކޯއިން ބުނީ ގޭބިސީތަކުން ދައްކަންޖެހޭ ކުނި ނެގުމުގެ ފީ ނެގޭނީ ފެނަކައާއި ސްޓެލްކޯގެ ބިލުގެ ތެރެއިން ކަމުގައި ވާއިރު، ގޭޓު ފީ ނެގުމަށް ހަމަޖެހިފައިވަނީ ޓްރާންސްފަރ ސްޓޭޝަނަށް ކުނި ބަރުކޮށްގެން ގެންނަ ކުނި އުފުލާ އުޅަނދު ރަޖިސްޓްރީ ކުރެވިފައިވާ 'އުފުލޭ ބަރުދަނަށް' ބަލައިގެން ކަމަށެވެ.

މި ބަދަލާއެކު އައްޑޫ އަދި ފުވައްމުލަކުން ކުނި ނަގަމުންދާ އަގަށް ބަދަލު ގެނެސްފައިވާއިރު، އެ ސިޓީތަކުން ދެން ކުނި ނަގާނީ މާލެ ސިޓީއާ އެއް ރޭޓެއްގައި ކަމަށާއި، އެއީ 150 ރުފިޔާ ކަމަށް ވެމްކޯއިން ބުންޏެވެ.

މި ފަހުން ވެމްކޯއިން ޚިދުމަތް ފެށި ކ. މާފުށި، ގދ. ތިނަދޫ އަދި ހދ. ކުޅުދުއްފުށީގެ ވެސް ގޭބިސީތަކުން ކުނި ނަގަމުންދަނީ އެ އަގުގައެވެ.