ރާއްޖެއިން ބޭރުގެ ކޮމްޕިއުޓަރު ޑޭޓާއަށް ޙުއްދަ ނެތި އެކްސެސްވުމުގެ ބާރު ފުލުހުންނަށް ދޭން ރައްޔިތުންގެ މަޖިލީހުން މިއަދު ފާސްކޮށްފިއެވެ.

ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް ސަރުކާރުގެ ފަރާތުން ރައްޔިތުންގެ މަޖިލީހަށް އެ އިސްލާހު ހުށަހެޅުއްވީ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދެވެ. މަޖިލީހުގައި މިއަދު ބޭއްވި ޖަލްސާގައި އެ ބިލަށް ވޯޓަށް އެހުމުން 58 މެންބަރުންގެ ވޯޓުން އެ ބިލު ވަނީ ފާސްކޮށްފައެވެ.

މި އިސްލާހަކީ ކުރީގެ ސަރުކާރުން ޑްރާފްޓުކޮށް މިދިޔަ އަހަރު މަޖިލީހަށް ހުށަހެޅި ބިލެއް ނަމަވެސް، އެ މަޖިލީހުގެ ދައުރު ހަމަވިއިރު ވެސް އެ ބިލާ މެދު އެއްވެސް ގޮތެއް ނިމިފައިނުވާތީ، އާ މަޖިލީހަށް އެ ބިލު މިހާރުގެ ސަރުކާރުގެ ފަރާތުން ހުށަހެޅީ ކުރިން ވެސް ބިލު އޮތްގޮތަށް ބަދަލެއް ނުގެނެސް އެވެ.

އެ އިސްލާހުގައި ބުނެފައިވާ ގޮތުގައި، ކޮމްޕިއުޓަރު ސިސްޓަމެއް މެދުވެރިކޮށް ކުރާ ކުށަކާ ގުޅިގެން ނުވަތަ ކޮމްޕިއުޓަރު ޑޭޓާއާ ގުޅޭ ކުށަކާ ގުޅިގެން ނުވަތަ އިލެކްޓްރޯނިކް ހެކި ހޯދަން ޖެހޭ ކަހަލަ، އެ ނޫން ވެސް ކުށަކާ ގުޅިގެން ބޭރު ޤައުމެއް ނުވަތަ ބޭރުގެ އެޖެންސީއަކާ އެކު، ނުވަތަ 24/7 ނެޓްވޯކަކާ އެކު ރާއްޖޭގެ އިދާރާތަކަށް މަސައްކަތް ކުރެވިދާނެ އެވެ.

ޖިނާއީ ތަޙުޤީޤު ހިންގުމުގެ ބާރު ލިބިފައިވާ އިދާރާއަކަށް ބޭރު ޤައުމެއްގެ ޙުއްދަ ހޯދުމަކާ ނުލައި މަޢުލޫމާތު ހޯދުމުގެ ބާރު ދޭން ވެސް އެ އިސްލާހުގައި ބުނެފައިވެއެވެ. ރާއްޖޭން ބޭރުގައި ހުރި ކޮމްޕިއުޓަރު ސިސްޓަމެއްގައި ރައްކާކޮށްފައި ހުރި ކޮމްޕިއުޓަރު ޑޭޓާ ހާމަކުރުމުގެ ޤާނޫނީ ބާރު ލިބިފައިވާ ފަރާތުގެ ރުހުން، ޤާނޫނާ އެއްގޮތަށް ހޯދުމަށް ފަހު ރާއްޖޭގައި ހުރި ކޮމްޕިއުޓަރު ސިސްޓަމެއް ބޭނުންކޮށްގެން އެ ޑޭޓާ ލިބިގަނެވޭނެ ކަމަށާއި ނުވަތަ އެ ޑޭޓާއަށް އެކްސެސްވެވޭނެ ކަމަށް ވެސް އިސްލާހުގައިވެއެވެ.

ބޭރު ޤައުމެއްގެ ކޮމްޕިއުޓަރު ޑޭޓާއަށް އެކްސެސްވުމަށް ފަހު، އެކަށީގެންވާ މުއްދަތެއްގެ ތެރޭގައި އެކަމާ ގުޅޭ ބޭރު ޤައުމަކަށް އެ ޑޭޓާ ލިބިގަތް ނުވަތަ ޑޭޓާއަށް އެކްސެސްވި އިދާރާއިން އަންގަންވާނެ ކަމަށް ވެސް އިސްލާހުގައިވެއެވެ.

އެޓާނީ ޖެނެރަލްގެ އޮފީހުން ކުރިން ބުނެފައިވާ ގޮތުގައި، މި އިސްލާހަކީ ރާއްޖޭގައި ހިންގާ ސައިބާ ކްރައިމްތައް ހުއްޓުވުމަށް ޤާނޫނަށް ގެނެވޭ ވަރަށް މުހިންމު އިސްލާހެކެވެ.