އަންހެން ހެދުން އަޅައިގެން ސޯޝަލް މީޑިއާގައި ވީޑިއޯ ޙިއްޞާކުރަމުން އަންނަ މުޙައްމަދު ނަބީލް (ޔާޔާ) އަށް ދައުވާކޮށް، އެ މައްސަލަ ކްރިމިނަލް ކޯޓަށް ފޮނުވައިފިއެވެ.

އާންމު އިޖުތިމާއީ މިންގަނޑުތަކާ ޚިލާފަށް އަންހެން ހެދުން އަޅައިގެން ސޯޝަލް މީޑިއާގައި ވީޑިއޯ ޙިއްޞާކުރަމުން އަންނަ މައްސަލައިގެ ތަޙުޤީޤު ފުލުހުން ނިންމުމަށް ފަހު ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވަނީ މިދިޔަ ޖުލައި މަހުގެ 17 ގައެވެ.

ހަޑިހުތުރު އެއްޗެއް ހިމެނޭ ވަސީލަތެއް ޝާއިއުކުރުމުގެ ދައުވާ ނަބީލަށް ކޮށްފައިވަނީ މިދިޔަ މަހު 25 ވަނަ ދުވަހުއެވެ.

ދައުވާކުރި ސަބަބެއް ކަމަށް ޕީޖީ އޮފީހުން ބުނެފައިވަނީ ކޯޓު އަމުރެއްގެ ދަށުން މިދިޔަ މެއި މަހުގެ 4 ވަނަ ދުވަހުގެ ހަވީރު 5:28 ގައި ކޯޓު އަމުރެއްގެ ދަށުން ގ. ޖަމަރާގޭގައި ނަބީލް ދިރިއުޅެމުންދާ ކޮޓަރި ބަލައި ފާސްކުރިއިރު، އެ ކޮޓަރި ތެރެއިން އޭނާ ބޭނުންކުރާ އަންހެން ހެދުންތައް ފުލުހުންނަށް ދައްކާފައިވާތީ ކަމަށެވެ.

މީގެ އިތުރުން ނަބީލުގެ ޓިކްޓޮކް އެކައުންޓުގައި އާންމުކޮށްފައިވާ ވީޑިއޯތައް ފުލުހުން ނަގައި އެނަލައިޒް ކުރިއިރު، އެ ވީޑިއޯތަކުގައި ނަބީލު ހަޑިހުތުރުކޮށް ނިވާކަންކުޑަ އަންހެން ހެދުންލައިގެން ނަށާފައިވުމަކީ ވެސް ދައުވާކުރި ސަބަބެއްގެ ގޮތުގައި ޕީޖީ އޮފީހުން ފާހަގަކޮށްފައިވެއެވެ.

އެ މައްސަލާގެ އަސާސީ އަދަބަކީ 4 މަހާއި 24 ދުވަހަށް ޖަލަށްލުމެވެ.

މިފަދަ މައްސަލަތަކާ ގުޅިގެން މީގެ ކުރިން ވެސް ނަބީލް ވަނީ އެތައް ފަހަރަކު ހައްޔަރުކޮށްފައެވެ. އޮރިޔާން ކާޑު ހެދުމުގެ ކުށުގެ ދައުވާގެ ދަށުން 2022 ވަނަ އަހަރުގެ ސެޕްޓެމްބަރު މަހުގެ 22 ވަނަ ދުވަހު އެއް އަހަރާއި އެއް މަހާއި ހަ ދުވަހުގެ ހުކުމެއް ވެސް ނަބީލަށް ކޮށްފައިވާކަން ފާހަގަކޮށްލެވެއެވެ.