Bangladesh gai nirubaveri hamalaathakeh dheefaanekamuge inzaaru dheefi

ޚުލާސާ

ބަންގްލަދޭޝްގައި ނިރުބަވެރި ހަމަލާތަކެއް ދީފާނެކަމުގެ އިންޒާރެއް އިނގިރޭސި ވިލާތުން ނެރެ، އެ ޤައުމުގައި ދިރިއުޅޭ އިނގިރޭސި ރައްޔިތުންނަށް ސަމާލުވުމަށް އަންގައިފި. މި ހަމަލާތައް އެހެން ޤައުމުތަކުގެ މީހުންނަށް އަމާޒުކޮށްފާނެ.

ބަންގްލަދޭޝްގައި ކުރިއަށް އޮތް ދުވަސްތަކުގައި ޓެރަރިސްޓުންގެ ނިރުބަވެރި ހަމަލާތަކެއް ދީފާނެކަމުގެ އިންޒާރެއް އިނގިރޭސިވިލާތުން ދީފިއެވެ. މި އިންޒާރުގައި އެ ޤައުމުގައި ދިރިއުޅޭ އިނގިރޭސި ރައްޔިތުން ސަމާލުވެ ތިބުމަށް އަންގާފައިވެއެވެ.

އިނގިރޭސި ސަރުކާރުން ނެރުނު ބަޔާނުގައި ބުނެފައިވަނީ ބަންގްލަދޭޝްގައި ނިރުބަވެރިކަމުގެ ހަރަކާތްތައް ހިންގުމުގެ ފުރުސަތު އިތުރުވެފައިވާ ކަމަށެވެ. އަދި މި ހަމަލާތައް އެ ޤައުމުގައި ދިރިއުޅޭ އެހެން ޤައުމުތަކުގެ މީހުންނަށް އަމާޒުކޮށްފާނެ ކަމަށް ވެސް އިންޒާރު ދީފައިވެއެވެ.

ނިރުބަވެރިން ހަމަލާ ދޭނެ ކަމަށް ބެލެވޭ ސަރަހައްދުތަކުގެ ތެރޭގައި މީހުން ތޮއްޖެހިފައިވާ ހިސާބުތަކާއި، ދީނީ އަޅުކަންކުރާ އިމާރާތްތަކާއި، ސިޔާސީ އެއްވުންތައް ހިމެނޭ ކަމަށް އިނގިރޭސި ސަރުކާރުން ލަފާކޮށްފައި ވެއެވެ. މީގެ އިތުރުން ބައެއް ދީންތަކުގެ މީހުންނާއި ފުލުހުންނާއި ސަލާމަތީ ބާރުތަކަށް އަމާޒުކޮށް ހަމަލާ ދިނުން އާންމުވެފައިވާ ކަމަށް ވެސް ބުނެފައިވެއެވެ.

"ބަންގްލަދޭޝް ސަރުކާރުން ދަނީ މިފަދަ ހަމަލާތައް ހުއްޓުވުމަށް މަސައްކަތް ކުރަމުން. އެގޮތުން ސަލާމަތީ ބާރުތައް ހަރަކާތްތެރިވުން އިތުރު ކުރުމާއި މީހުން ހަރަކާތްތެރިވާ ތަންތަން މަދު ކުރުން ހިމެނޭ،" އިނގިރޭސި ވިލާތުގެ ބަޔާނުގައި ބުނެފައިވެއެވެ.

އިނގިރޭސި ސަރުކާރުން ވަނީ ބަންގްލަދޭޝްގައި ދިރިއުޅޭ އެ ޤައުމުގެ ރައްޔިތުންނަށް ބަންގްލަދޭޝް ސަރުކާރުގެ އެންގުންތަކަށް ތަބާވުމަށާއި، މި ދުވަސްކޮޅު މީހުން ގިނަ ތަންތަނަށް ނުދިއުމަށް އިރުޝާދު ދީފައެވެ.