އެންމެހައި ޒުވާނުންނަކީ ވެސް މި ގައުމަށް ބޭނުންތެރި، ހެޔޮލަފާ ބަޔަކަށް ހެދުމަށް އީޖާބީ ވިސްނުން ކުރިއަށް ނެރެގެން މަސައްކަތްކުރަންޖެހޭ ކަމުގައި އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެމްއެމްޓީވީއިން މރޭ ގެނެސްދިން "ބޮޑު ޚަބަރު" ޕްރޮގްރާމުގައި، ޒުވާން ޖީލު އިސްލާމީ ކަންތައްތަކާއި ދުރަށްދާ ކަހަލަ މަންޒަރެއް ފެނުމަކީ ގިނަ ބައެއްގެ ކަންބޮޑުވުމެއްކަން ފާހަގަކުރައްވައި، މިނިސްޓަރު ޝަހީމް ވިދާޅުވީ އަބަދުވެސް ޕޮޒިޓިވް ވިސްނުން ކުރިއަށް ނެރުމަކީ ވަރަށް މުހިންމު ކަމެއް ކަމަށެވެ.

"ހުރިހާ ޒުވާނުންނަކީ ގޯސް މީހުންގެ ގޮތުގައި އެއްވެސް މީހަކު ސިފަ ކޮށްގެން ނުވާނެ. ހުރިހާ މުޖުތަމައުއެއްގައި ވެސް ތަފާތު ފިކުރުތަކުގެ ޒުވާނުންނާއި، ގޯސް މަގުންދާ ކުދިން ވެސް އުޅޭނެ. ނަމަވެސް ގޯސް މަގުން ދާ ކުދިން ވެސް އަބަދު ގޯސް މަގުގައި ތިބޭނެ ކަމަށް ވިސްނައިގެން ނުވާނެ. އިސްލާހުގެ މަގަށް އަންނާނެ ކިތަންމެ ކުދިންނެއް އުޅޭނެ،" ޝަހީމް ވިދާޅުވިއެވެ.

ޝަހީމް އިތުރަށް ވިދާޅުވީ، ކޮންމެ މީހަކު ވެސް ވާންޖެހޭނީ އީޖާބީ ޕޮޒިޓިވް ވިސްނުން ކުރިއަށް ނެރެގެން މަސައްކަތް ކުރާ މީހަކަށް ކަމަށާއި، ޒުވާނުންނަކީ ހެޔޮލަފާ، އިލްމީ، ގާބިލު، ހުނަރުވެރި ބަސްއަހާ ރަނގަޅު ޖީލަކަށް ވޭތޯ ވެރިކަމުގެ ފަރާތުންނާއި، މުޖުތަމައުގެ ފަރާތުން ވެސް ވަރަށް ބޮޑަށް މަސައްކަތް ކުރަންޖެހޭނެ ކަމަށެވެ.

"އަޅުގަނޑުމެންގެ ރައީސް ވެރިކަމާއި ހަވާލުވެވަޑައިގެން ދެއްވި ފުރަތަމަ ތަގުރީރުގަ ވެސް ވިދާޅުވެފައި އޮންނާނެ މަަސައްކަތް ކުރައްވަނީ ހަމައެކަނި މާއްދީ ތަރައްގީއަށް ނޫންކަން. އިންސާނާ ބިނާކުރުމަކީ ވެސް ވަރަށް މުހިންމު ކަމެއްކަން. އެހެންވީމަ އޭގެ ދަށުން އަޅުގަނޑުމެން މަސައްކަތް މި ކުރަނީ. އިރާދަކުރެއްވިއްޔާ އަޅުގަނޑުމެންގެ ވުޒާރާއާއި ގުޅޭ ކަންތައްތަކުގަ އަޅުގަނޑުމެން މަަސައްކަތް ކުރާނީ އީޖާބީ ވިސްނުން ކުރިއަށް ނެރެގެން،" ޝަހީމް ވިދާޅުވިއެވެ.

ޝަހީމް ވިދާޅުވީ، ޒުވާނުންނަކީ މުސްތަގުބަލުގައި މި ގައުމުގައި އިސްލާމީ ޝަޚުސިއްޔަތު ދަމަހައްޓައި، ދީނީ ވަހުދަތު ހިފަހައްޓައި މި ގައުމު ރަނގަޅު މިސްރާބަކަށް ގެންދާނެ ޖީލު ކަމަށެވެ. އެހެންކަމުން އެ ޖީލަށް ރަނގަޅު މަގު ދައްކައި، އެ މީހުންގެ އަތުގައި ހިފައި، އެ މީހުންނަކީ ފުދުންތެރި އެހެން މީހުންނަށް ބަރޯސާނުވެ އުޅޭ ރަނގަޅު ބަޔަކަށް ހެދުމަށް މަސައްކަތް ކުރަންޖެހޭ ކަމަށް ޝަހީމް ވިދާޅުވިއެވެ.

މި ބައްދަލުވުމުގައި، ޒުވާނުންގެ މެދުގައި ދީނީ ހޭލުންތެރިކަން އިތުރުކުރުމަށް އިސްލާމިކް މިނިސްޓްރީން ކުރިއަށްގެންދާ މަސައްކަތްތަކާއި ބެހޭގޮތުން ވެސް މިނިސްޓަރު މަޢުލޫމާތު ދެއްވިއެވެ. މީގެ ތެރޭގައި މިސްކިތްތަކުގައި ބާއްވާ ދީނީ ދަރުސްތަކާއި، ސްކޫލްތަކުގައި ހިންގާ ދީނީ ޕްރޮގްރާމްތައް ހިމެނެއެވެ.

"އަޅުގަނޑުމެން މިހާރު ވަނީ ޒުވާނުންނަށް އަމާޒުކޮށްގެން ޚާއްޞަ ދީނީ ޕްރޮގްރާމްތަކެއް ފަރުމާކޮށްފައި. މި ޕްރޮގްރާމް ތަކުގައި ޒުވާނުންނަށް ދިމާވާ މައްސަލަ ތަކާއި، އެ މައްސަލަ ތަކަށް އިސްލާމްދީނުގެ ނަޒަރިއްޔާތުން ހައްލު ހޯދުމުގެ މުހިންމުކަން އަޅުގަނޑުމެން ފާހަގަ ކުރަން،" ޝަހީމް ވިދާޅުވިއެވެ.

ޝަހީމް ވިދާޅުވީ، ޒުވާނުންނަށް އަމާޒު ކޮށްގެން ކުރިއަށް ގެންދާ މި މަސައްކަތް ތަކުގައި މައިންބަފައިންނާއި، މުޖުތަމަޢުގެ އެހެނިހެން ފަރާތްތަކުގެ އެއްބާރުލުން ވެސް ވަރަށް މުހިންމު ކަމަށެވެ. އެހެނީ ޒުވާނުންގެ ތަރުބިއްޔަތަކީ ހަމައެކަނި ސަރުކާރުގެ ޒިންމާއެއް ނޫން ކަމަށާއި، މުޅި މުޖުތަމަޢުގެ ޒިންމާއެއް ކަމަށް ޝަހީމް ވިދާޅުވިއެވެ.

ޒުވާނުންނަކީ ގައުމުގެ މުސްތަޤުބަލް ކަމަށާއި، އެ މީހުންނަށް ރަނގަޅު މަގު ދެއްކުމަކީ މިއަދުގެ ޖީލުގެ އަމާނާތެއް ކަމަށާއި އަދި މި މަސައްކަތުގައި ކާމިޔާބު ވުމަށްޓަކައި އެންމެން އެކުގައި މަސައްކަތް ކުރުމުގެ މުހިންމުކަމަށް ޝަހީމް ވިދާޅުވިއެވެ.