އިނގިރޭސިވިލާތުގެ އިންގްލެންޑާއި ވޭލްސްގައި 2023ވަނަ އަހަރު އުފަންވި ފިރިހެން ކުދިންގެ ތެރެއިން އެންމެ ގިނަ އަދަދެއްގެ ކުދިންނަށް ދީފައިވާ ނަމަކީ މުޙައްމަދު ކަން ހާމަވެއްޖެއެވެ. މި މަޢުލޫމާތު ހާމަކޮށްފައިވަނީ އިނގިރޭސިވިލާތުގެ އޮފީސް ފޯ ނޭޝަނަލް ސްޓެޓިސްޓިކްސް (އޯއެންއެސް) އިންނެވެ.
އޯއެންއެސްގެ ތަފާސްހިސާބުތަކުން ދައްކާގޮތުގައި، 2023ވަނަ އަހަރު އިންގްލެންޑާއި ވޭލްސްގައި އުފަންވި 4,600 ފިރިހެން ކުދިންނަށް މުޙައްމަދު މި ނަން ދީފައިވެއެވެ. މި ނަމަކީ އިސްލާމްދީނުގެ މަތިވެރި ނަބިއްޔާ މުޙައްމަދު ﷺ ގެ ނަންފުޅާއި ގުޅުވައިގެން ދީފައިވާ ނަމެކެވެ.
2022ވަނަ އަހަރު އެންމެ މަޝްހޫރު ނަމެއްގެ ގޮތުގައި އޮތް "ނޫޙް" މިހާރު ވަނީ ދެވަނައަށް ޖެހިފައެވެ. މުޙައްމަދު މި ނަން 2016ވަނަ އަހަރުން ފެށިގެން އެންމެ މަޝްހޫރު 10 ނަމުގެ ތެރޭގައި ހިމެނެމުން އައިސް، 2022ވަނަ އަހަރުން ފެށިގެން ދެވަނައިގައި އޮތުމަށްފަހު، މިހާރު ވަނީ އެންމެ މަތީ ދަރަޖައަށް އަރާފައެވެ.
Advertisement
2023ވަނަ އަހަރުގެ ފިރިހެން ކުދިންގެ މަޝްހޫރު ނަންތަކުގެ ތެރޭގައި އޮލިވަރ އަދި ޖޯޖް ހިމެނެއެވެ. އަންހެން ކުދިންގެ މެދުގައި އެންމެ މަޝްހޫރު ނަމަކީ އޮލިވިޔާ ކަމަށްވާއިރު، އެމީލިޔާ އަދި އައިލާ ވެސް ވަނީ އެންމެ މަޝްހޫރު ނަންތަކުގެ ތެރޭގައި ހިމެނިފައެވެ.
އޯއެންއެސްއިން އިތުރަށް ފާހަގަކުރި ގޮތުގައި، މަޝްހޫރު ފިލްމީ ތަރިންނާއި ލަވަކިޔުންތެރިންގެ ނަންތައް ވެސް ދަރިންނަށް ދިނުމުގައި އިތުރުވަމުން އަންނަ ކަމަށް ފެނެއެވެ. މިގޮތުން ބިލީ އައިލިޝް، ލާނާ ޑެލް ރޭ، މާގޯ ރޮބީ އަދި ކިލިޔަން މަރފީ ފަދަ ނަންތައް ފާހަގަކުރެވެއެވެ. އަދި، އިނގިރޭސި ޝާހީ ޢާއިލާގެ ބޭފުޅުންގެ ނަންތަކުގެ މަޝްހޫރުކަން ދަށްވަމުންދާކަން ވެސް ފާހަގަކުރެވެއެވެ.
