ޔޫއެފާ ވިމެންސް ޔޫރޯ 2025 ގެ ފައިނަލުގައި ސްޕެއިން ބަލިކޮށް އިނގިރޭސީ ވިލާތުން ޖެހިޖެހިގެން ދެވަނަ ފަހަރަށް ތަށި ކާމިޔާބުކޮށްފިއެވެ.
މެޗުގެ 90 މިނެޓު 1-1 ނަތީޖާއިން ނިމި އިތުރު ވަގުތުގެ ދެ ހާފުގައި ގޯލެއް ނުޖެހި ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. އިނގިރޭސީން މި ޕެނަލްޓީ ޝޫޓްއައުޓް ކާމިޔާބުކޮށްފައިވަނީ 1-3 ގެ ނަތީޖާއިންނެވެ.
މެޗުގެ ފުރަތަމަ ގޯލު 25 ވަނަ މިނެޓުގައި ސްޕެއިނަށް ކާމިޔާބުކުރީ މަރިއޯނާ ކަލްޑެންޓޭއެވެ. ދެވަނަ ހާފުގައި 57 ވަނަ މިނެޓުގައި އަލޭޝިއާ ރުސޯ ވަނީ އިންގްލެންޑަށް ނަތީޖާ ހަމަހަމަ ކޮށްދީފައެވެ.
ޕެނަލްޓީގައި އިންގްލެޑުން ޖެހި ފުރަތަމަ ޕެނަލްޓީއާއި ހަތަރު ވަނަ ޕެނަލްޓީ ސްޕެއިންގެ ކީޕަރު ކަޓަރ ކޯލް ވަނީ ދިފާއުކޮށްފައެވެ. އަދި ސްޕެއިންގެ ދެވަނަ ޕެނަލްޓީއާއި ތިން ވަނަ ޕެނަލްޓީ އިންގްލެންޑުގެ ކީޕަރު ހެނާ ހެމްޕޓަން ވަނީ ދިފާއުކޮށްފައެވެ. ސްޕެއިންގެ ހަތަރު ވަނަ ޕެނަލްޓީ ދިޔައީ ތިން ދަނޑިން ބޭރަށެވެ. ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދާފައިވަނީ އިންގްލެންޑުގެ ކީޕަރު ހެނާ ހެމްޕޓަނެވެ.
މުބާރާތުގެ މޮޅު ކުޅުންތެރިޔާގެ މަގާމު ލިބިފައިވަނީ ސްޕެއިންގެ މެދު ތެރެއަށް ކުޅޭ އައިޓާނާ ބޮންމަތީއެވެ. ސެމީ ފައިނަލުގައި ޖަރުމަނާ ދެކޮޅަށް ކުޅުނު މެޗުގައި ހަމައެކަނި ގޯލު 113 ވަނަ މިނެޓުގައި ކާމިޔާބުކޮށް ސްޕެއިން ފައިނަލަށް ގެންގޮސްދިނީ އައިޓާނާއެވެ. ނަމަވެސް ފައިނަލުގެ ޕެނަލްޓީ ޝޫޓްއައުޓްގައި އޭނާއަށް ޕެނަލްޓީ ކާމިޔާބު ކުރެވިފައެއް ނުވެއެވެ. ބާސެލޯނާއަށް ކުޅޭ އައިޓާނާއަކީ 2023 އަދި 2024 ވަނަ އަހަރު ބެލޮންޑިއޯ ކާމިޔާބުކުރި ކުޅުންތެރިޔާ އެވެ. މި މުބާރާތުގެ މޮޅު ކުޅުމާއެކު މިއަހަރުގެ ބެލޮންޑިއޯ ވެސް ލިބުމުގެ ފުރުސަތު އޭނާއަށް އެބައޮތެވެ.
މުބާރާތުގެ ގޯލްޑެން ބޫޓް ލިބިފައިވަނީ ސްޕެއިންގެ ފޯވާޑު އެސްތަރ ގޮންޒާލޭޒަށެވެ. މި މުބާރާތުގައި އޭނަ ވަނީ ހަތަރު ގޯލު ކާމިޔާބުކޮށްފައެވެ. ޔޫރޯގައި މިހާތަނަށް އޭނާ ވަނީ ޖުމްލަ ފަސް ގޯލު ކާމިޔާބުކޮށް ތާވަލުގެ 10 ވަނައަށް އަރާފައެވެ. އެންމެ ގިނަ ގޯލު ޖެހި ކުޅުންތެރިންގެ ރެކޯޑު އޮތީ ޖަރުމަނުގެ ކުރީގެ ކުޅުންތެރިން ކަމަށްވާ އިންކާ ގްރިންގްސް އަދި ބާގިޓް ޕްރިންޒް އަތުގައެވެ. މިއިން ކޮންމެ ކުޅުންތެރިއަކު ވަނީ 10 ގޯލު ކާމިޔާބުކޮށްފައެވެ.
މި މުބާރާތް އެންމެ ގިނަ ފަހަރު ކާމިޔާބުކުރި ގައުމަކީ ވެސް ޖަރުމަނެވެ. ޖުމްލަ އަށް ފަހަރު ޖަރުމަނުން މުބާރާތް ކާމިޔާބުކޮށްފައިވާއިރު ދެވަނައިގައި އޮތީ މިރޭ މުބާރާތް ކާމިޔާބުކުރި އިނގްލެންޑާއި ނޯވޭއެވެ. މި މުބާރާތް ދެން އޮންނާނީ 2029 ވަނަ އަހަރުގައެވެ.
