އަންނަ އަހަރު ހައްޖަށް ދިއުމަށް ކިޔޫގައި ތިބި ބައެއް މީހުން މިހާރު ކިޔޫގެ ފަހަތަށް ޖެހިފައިވާ ކަމަށް ބުނެ ބައެއް މީހުން ސޯޝަލް މީޑިއާގައި ދައްކަނީ ޙަޤީޤަތާއި ޚިލާފު ވަހަކަތަކެއް ކަމަށް މޯލްޑިވްސް ޙައްޖު ކޯޕަރޭޝަނުން ބުނެފިއެވެ.
އެ ކޯޕަރޭޝަނުގެ އިސް އޮފިޝަލަކު ވިދާޅުވީ އަންނަ އަހަރު ޙައްޖުގެ އަޅުކަމަށް އެ ކޯޕަރޭޝަންގެ އުޞޫލުގެ ތެރެއިން ޖާގަ ހަމަޖެހިފައިވާ ހުރިހާ މީހުންނަށް ފުރުޞަތު ލިބޭނެ ކަމަށާއި، ކިޔޫގައިވާ އެއްވެސް މީހަކު ފަހަތަށް ޖައްސައި އެއްވެސް މީހަކަށް ލިބޭ ޙައްޤަކަށް އުނިކަމެއް އަންނަ ފަދަ އެއްވެސް ކަމެއް އެ ކޯޕަރޭޝަނުން ނުކުރާއިރު، މަސައްކަތް ކުރަމުން ދަނީ ވީހާވެސް ގިނަ މީހުންނަށް ޙައްޖަށް ދިޔުމުގެ ފުރުޞަތު ފަހި ކޮށްދެވޭތޯއެވެ.
"ކިޔޫގައި ހުރި އެއްވެސް މީހަކު ފަހަތަށް ޖައްސައި އެފަދަ ކަމެއް ނުކުރޭ. ނުވެސް ކުރާނެ. މިހާރު ވެސް މި ބަލަނީ ސައޫދީ ސަރުކާރާއިއެކު މަޝްވަރާކޮށް ރާއްޖެއަށް ލިބިފައިވާ ކޯޓާ އިތުރު ކުރެވޭތޯ. ޔަގީން ކިއުގައި ތިބި އެއްވެސް މީހަކު ފަހަތަކަށް ނުޖައްސާ" ހައްޖު ކޯޕަރޭޝަންގެ އިސް އޮފިޝަލަކު ވިދާޅުވިއެވެ.
Advertisement
ސޯޝަލް މީޑިއާގައިވާ ކަންބޮޑުވުންތަކާއި ގުޅިގެން އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވެސް އެކްސްގައި ޕޯސްޓެއް ކުރެއްވިއެވެ. އެމަނިކުފާނު ވިދާޅުވީ އަންނަ އަހަރު ހައްޖަށް ދިއުމުގެ ޖާގަ ހައްޖު ކޯޕަރޭޝަނުގެ ސިސްޓަމުގެ ތެރެއިން ލިބިފައިވާ އެންމެންނަށް ހައްޖުވުމުގެ ފުރުސަތު ލިބޭނެ ކަމުގެ ޔަގީންކަން ދެއްވާ ކަމަށެވެ.
އިސްލާމިކް މިނިސްޓްރީން ނިންމާފައި ވަނީ ރާއްޖެއަށް ލިބޭ ހުރިހާ ކޯޓާއެއް ހައްޖު ކޯޕަރޭޝަނަށް ދިނުމަށެވެ.
ރާއްޖެއިން މި އަހަރު ހައްޖުގެ އަޅުކަމަށް 1،150 މީހުން ގެންދިޔަ އެވެ.
ރާއްޖެއަށް ލިބޭ ހައްޖު ކޯޓާ އިތުރުކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނައިރު، މި އަހަރަކީ ހައްޖު ކޯޕަރޭޝަންގެ ތާރީހުގައި ވެސް އެންމެ ގިނަ އަދަދަކަށް ހައްޖަށް މީހުން ގެންދިޔަ ދެވަނަ އަހަރެވެ.
