މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތައްޔާރުކުރަމުންދާ ބޭރު ފައިސާއާ ބެހޭ ބިލަށް ކާނި ހޮޓެލްސްގެ ސީއީއޯ އަދި ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްގޭމް) ގެ ރައީސް އަބްދުﷲ ނަޝީދު (ކާނި އަބްދުﷲ) ތާއީދުކުރައްވައިފިއެވެ.
މި ބިލުގެ މައިގަނޑު މަޤްޞަދަކީ 2022 ވަނަ އަހަރުގެ އޮކްޓޯބަރު 1 ގައި އަމަލުކުރަން ފެށި ބޭރު ފައިސާއާ ބެހޭ ގަވާއިދުގައި ބަޔާންކޮށްފައިވާ ކަންކަން އިތުރަށް ހަރުދަނާކުރުމެވެ. މި ގަވާއިދުގެ ދަށުން، ރިސޯޓުތަކާއި ގެސްޓްހައުސްތަކަށް ލިބޭ ޑޮލަރުގެ ތެރެއިން ވަކި މިންވަރެއް ބޭންކްތަކުން މާރުކުރަން ޖެހެއެވެ.
އެމްއެމްއޭ އިން އާންމުކުރި ބިލްގައިވާ ގޮތުން، ޓޫރިސްޓު ރިސޯޓުތަކާއި އިންޓަގްރޭޓެޑް ރިސޯޓުތަކުން ކޮންމެ ޓޫރިސްޓަކަށް 500 ޑޮލަރުގެ ރޭޓުން، އަދި ޓޫރިސްޓު ހޮޓާތަކާއި ގެސްޓްހައުސްތަކުން ކޮންމެ ޓޫރިސްޓަކަށް 25 ޑޮލަރުގެ ރޭޓުން ބޭންކަކަށް ޖަމާކޮށް ރުފިޔާއަށް މާރު ކުރަންޖެހެއެވެ.
ކާނި އަބްދުﷲ އެކްސްގައި ޝާއިއު ކުރި ޕޯސްޓެއްގައި ވިދާޅުވީ، ރަށްރަށުގައި ހުންނަ ގެސްޓްހައުސްތަކާއި ހޮޓާތަކުން ޓޫރިސްޓަކަށް ބޮލަކަށް 25 ޑޮލަރު މާރު ކުރަން ޖެހޭ ގޮތަށް ބިލްގައި ކަނޑައަޅާފައި އޮތުމުން އެކަމަށް ތާއީދު ކުރައްވާ ކަމަށެވެ.
ކާނި އަބްދުﷲ ވިދާޅުވި ގޮތުގައި މި ބިލުގެ ސަބަބުން ރަށްރަށުގެ ރައްޔިތުންނަށް ވަރަށް ގިނަ ފައިދާތައް ލިބިގެންދާނެއެވެ. "ރަށްރަށުގެ ރައްޔިތުންނަށް ވަރަށް ގިނަ ފައިދާތައް ލިބިގެން ދާނެ، އެތައް ވަޒީފާއެއް، ފިހާރަތަކުގެ ވިޔަފާރި ފުޅާވެގެން ދާނެ، ފަރުމަސް ވެރިކަން ކުރާ މީހުން ބާނާ މަސް ކޮޅު ހޮޓަލަށް ގަންނާނެ," އޭނާ ވިދާޅުވިއެވެ.
ކާނި އަބްދުﷲ އަކީ މިވަގުތު ފަތުރުވެރިކަމުގެ ސިނާޢަތުގައި އެންމެ އުސް ފަންތީގައި ވިޔަފާރި ކުރަމުންދާ އެއް ފަރާތެވެ. ކާނި އަބްދުﷲ ގެ އަމިއްލަ ވިޔަފާރިތަކުގެ ތެރެއިން، އއ. އުކުޅަހުގައި 150 އެއްހާ ކޮޓަރީގެ ގެސްޓްހައުސްއެއްގެ މަސައްކަތް މިހާރު ދާނީ ހަލުވިދުވެލި އެއްގައި ކުރިއަށް ދަމުންނެވެ. އަދި ރިސޯޓެއް ތަރައްޤީ ކުރުމުގެ މަސައްކަތްވެސް އޭނާ ދަނީ ކުރިއަށް ގެންދަވަމުންކަން ފާހަގަކުރެވެއެވެ.
