ގދ. ތިނަދޫ ސިޓީއަކަށް ބަދަލުކުރިގޮތް ރައްޔިތުންގެ މަޖިލީހުން ބަލައިދިނުމަށް އެދިއްޖެއެވެ.

ތިނަދޫ ސިޓީއަކަށް ބަދަލުކުރުމުގައި ޤާނޫނާއި ޚިލާފަށް ކަންތައްތަކެއް ހިނގާފައިވޭތޯ ބެލުމަށް އެދި ރައްޔިތުންގެ މަޖިލީހުގެ ރައީސް އަބްދުއްރަހީމް ޢަބްދުﷲ އަށް ސިޓީ ފޮނުއްވާފައިވަނީ ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީއެވެ.

ޤާނޫނުގެ ތެރެއިން ތިނަދޫ ސިޓީއަކަށް ބަދަލުކުރުމަކީ ބޭނުންވާ ކަމެއް ނަމަވެސް ނިމިދިޔަ އިބްރާހިމް މުޙައްމަދު ޞާލިޙްގެ ވެރިކަމުގައި ތިނަދޫއަށް ސީޓީގެ ދަރަޖަ ދީފައިވަނީ ޤާނޫނާއި ޚިލާފަށް ކަމަށް އެ ސިޓީގައި ބަޔާންކޮށްފައިވެއެވެ. އަދި އެކަން ކުރުމުގައި ތިނަދޫ ކައުންސިލުން ބޮޑެތި އޮޅުވާލުންތަކެއް އޮޅުވާލާފައިވާކަމަށްވެސް ސިޓީގައި ބުނެފައިވެއެވެ. އެގޮތުން އެހެން ރަށްތަކުގެ ރަޖިސްޓްރީގައި ތިބި މީހުންނަށް ނޭނގި، އެމީހުންގެ ރަޖިސްޓްރީ ތިނަދޫއަށް ބަދަލުކޮށް، ތިނަދޫގެ ރަޖިސްޓްރީގައި ތިބި ގިނަ ބަޔަކު ޑަބަލްކޮށް ހިމަނާ، މީހުންގެ ނަމާއި ގޭގެ ނަންތައް އެކި ގޮތް ގޮތަށް ބަދަލުކޮށްފައިވާކަމަށް ސިޓީގައި ބުނެފައިވެއެވެ.

މީގެ އިތުރުން މަރުވެފައިވާ މީހުންވެސް ދިރިތިބި ކަމަށް ހަދައި، ރަށްވެހިކަން ބަދަލުވެފައިވާ މީހުންވެސް ތިނަދޫގެ ރަޖިސްޓްރީގައި ހިމަނާފައިވާކަމުގެ ކަންބޮޑުވުން ގިނަ ބަޔަކު ފާޅުކުރަމުން އަންނަ ކަމަށް ސައުދު ވިދާޅުވިއެވެ.

"އެލްޖީއޭއިން ރެންޑަމްކޮށް ޗެކްކުރި އިރު 307 މީހުންގެ އައިޑީކާޑު ނަންބަރު ވަނީ ތަކުރާރުވެފައި. ޑީއެންއާރުގެ ހިސާބުތަކުން ވެސް 8000 މީހުން ވެސް ތިނަދޫގައި ހަމަ ނުވޭ." ސައުދު ވިދާޅުވިއެވެ.

ސައުދު ވިދާޅުވީ އޮޅުވާލުންތަކެއްގެ ތެރެއިން ތިނަދޫ ސިޓީއަކަށް ބަދަލުކޮށްފައިވަނީ އެމްޑީޕީގެ މެޖޯރިޓީ އޮތް ކައުންސިލަރުން ހޮވުމަށްފަހު ކައުންސިލްގެ ރައީސް މޭޔަރުކަމަށް ވަޑައިގަތުމަށް ކަމަށް ބެލެވޭ ކަމަށެވެ. އަދި ރައީސް ޞާލިޙް އޭރު ތިނަދޫއަށް ދެން ވަޑައިގަންނަވާނީ ސީޓިއަކަށް ހައްދަވާފައިކަމަށް ވިދާޅުވެފައިވާކަން ވެސް ސައުދު ފާހަގަކުރެއްވިއެވެ.

ސައުދު ވަނީ ދައުލަތުގެ ފަރާތުން ދޭ ބްލޮކް ގްރާންޓްސް ފަދަ ފައިސާ މަކަރާއި ޙީލަތުން ނުހައްގުން ބޮޑު ޢަދަދަކުން ކައުންސިލުން ހޯދާކަމަށްވެސް ތުހުމަތުކޮށްފައެވެ. އަދި އެ ފައިސާއިން އެމްޑީޕީއަށް ނިސްބަތްވާ މީހުންނަށް ވަޒީފާ ދިނުމާއި، ބޭކާރު ދަތުރުތައް ރާއްޖެއާއި ރާއްޖެއިން ބޭރަށް ކުރަމުން އަންނަ ކަމަށް ސައުދު ތުހުމަތުކުރެއްވިއެވެ.

ސައުދު ވިދާޅުވީ މި މައްސަލަ މަޖިލީހުން ބަލައިދިނުމަށް ހުށަހެޅުއްވީ ދާއިރާގެ ގިނަ ރައްޔިތުންގެ ކަންބޮޑުވުންތައް އެކަމުގައި ހުރުމުން ކަމަށެވެ. އެގޮތުން މަޖިލީހުގެ ކަމާ ގުޅުންހުރި ކޮމިޓީތަކާއި މުއައްސަސާތަކުން އެ މައްސަލަ ބަލައިދިނުމަށް ސައުދު ވަނީ އެދިވަޑައިގެންފައެވެ.