މޯލްޑިވްސް ޓޫރިޒަމް އެވޯޑަށް ނަން ހުށަހެޅުމުގެ މުއްދަތު ދެވަނަ ފަހަރަށް އިތުރުކޮށްދީފި އެވެ.
ޓޫރިޒަމް އެވޯޑަށް ނަން ހުށަހަޅަން ދިން މުއްދަތު އެންމެ ފުރަތަމަ ހަމަވީ މިދިޔަ މަހުގެ 14 އަށެވެ. އޭގެ ފަހުން އެ މުއްދަތު މި މަހުގެ 28 އަށް ވަނީ އިތުރުކޮށްފައެވެ.
ޓޫރިޒަމް މިނިސްޓްރީން އިއްޔެ ކުރި އިއުލާނެއްގައި ބުނީ އެ އެވޯޑަށް ނަން ހުށަހެޅުމުގެ ފުރުސަތު އަންނަ މަހުގެ ހަތަކާއި ހަމައަށް މިހާރު އިތުރުކޮށްދީފައިވާ ކަމަށެވެ.
Advertisement
މި އެވޯޑަށް ކުރިމަތިލުމުގެ ފުރުސަތު ދީފައި ވަނީ ރިސޯޓުތަކާއި ހޮޓާތަކާއި ގެސްޓުހައުސްތަކާއި ސަފާރީތައް އަދި ޓްރެވެލް އެޖެންސީތަކަށެވެ. ފަސް ކެޓަގަރީއަކުން 23 އެވޯޑް ދޭން ނިންމާފައިވާ މި އެވޯޑަށް އެޕްލިކޭޝަން ހުށަހަޅަން ޖެހެނީ އޮންލައިންކޮށެވެ.
މިނިސްޓްރީން ބުނި ގޮތުގައި، މި އެވޯޑް ދިނުމުގައި ބަލާނީ ޖޫން 1، 2023 އިން މި އަހަރުގެ މެއި މަހުގެ 31 ވަނަ ދުވަހުގެ ނިޔަލަށް ކޮށްފައިވާ މަސައްކަތްތަކަށެވެ.
މޯލްޑިވްސް ޓޫރިޒަމް އެވޯޑަކީ ރާއްޖޭގެ ޓޫރިޒަމަށް 50 އަހަރު ފުރުމާއި ގުޅިގެން 2022 ވަނަ އަހަރުން ފެށިގެން ޓޫރިޒަމް މިނިސްޓްރީން ދެމުން އަންނަ އެވޯޑެކެވެ.
