ވާޓިކަލް ފާމިންގެ މަޝްރޫއު ކުރިއަށް ގެންދިޔުމަށް 5 ރަށެއް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ކަނޑައަޅައިފިއެވެ. މި މަޢުލޫމާތު ހާމަކުރެއްވީ ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ އެވެ.
ދައުލަތުގެ މީޑިއާ ޕްރޮގްރާމްގައި ވާހަކަދައްކަވަމުން ވަޒީރު ވިދާޅުވީ، ރާއްޖޭގެ ދަނޑުވެރިކަމުގެ ދާއިރާ ޒަމާނާ އެއްގޮތަށް ތަރައްގީކުރުމަކީ ސަރުކާރުގެ މުހިއްމު ސިޔާސަތެއް ކަމަށެވެ. އެގޮތުން، ވަރޓިކަލް ފާމިންގެ ސްޓްރަކްޗަރ ރާއްޖެއަށް ގެނައުމުގެ މަސައްކަތް މިހާރު ކުރަމުންދާ ކަމަށް ވަޒީރު ވިދާޅުވިއެވެ.
ވަރޓިކަލް ފާމިންގެ މަޝްރޫއުތައް ކުރިއަށް ގެންދިޔުމަށް ކަނޑައަޅާފައިވާ 5 ރަށަކީ:
Advertisement
- ނ. ކެނދިކުޅުދޫ
- ޅ. ނައިފަރު
- ރ. ހުޅުދުއްފާރު
- އއ. މަތިވެރި
- ތ. ކިނބިދޫ
ވަޒީރު އިތުރަށް ވިދާޅުވީ، ޔޫއެންޑިޕީގެ އެހީގައި ކުރިއަށްގެންދާ މި މަޝްރޫއުގެ ދަށުން، މިއަހަރު ފަހުކޮޅު ނުވަތަ އަންނަ އަހަރުގެ ކުރީކޮޅު ސްޓްރަކްޗަރގެ މަސައްކަތް ނިމި، އަމަލީ މަސައްކަތް ފެށޭނެ ކަމަށެވެ.
މީގެއިތުރުން، ސްޓްރަކްޗަރތައް ގެނައުމަށްފަހު، ރަށްރަށުގެ ރައްޔިތުންނަށް ވަރޓިކަލް ފާމިންގެ ތަމްރީންތައް ދިނުމާއި، މި ސިސްޓަމްތައް ބޭނުންކޮށްގެން ގަސް ހެއްދުމަށް ބޭނުންވާ ފަންނީ އެހީތެރިކަން ވެސް ފޯރުކޮށްދޭނެކަމަށް ވަޒީރު ވިދާޅުވިއެވެ.
ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ބުނެފައިވަނީ، ހައިޑްރޯފޯނިކްސް އާއި ގްރީންހައުސްގައި ހައިޑްރޯފޯނިކްސް ބޭނުންކޮށްގެން ދަނޑުވެރިކަން ކުރުން ރާއްޖޭގައި މިހާރު ޢާއްމުވަމުން އަންނަ ކަމަށެވެ. އަދި މިއީ ގަސްގަހަށް ޖެހޭ ބަލިތައް މަދުވާ ކަމެއް ކަމަށްވެސް އެ ވުޒާރާއިން ބުންޏެވެ.
ރާއްޖޭގެ ދަނޑުވެރިކަމުގެ ދާއިރާ އިތުރަށް ފުޅާކުރުމަށްޓަކައި ސަރުކާރުން ވަނީ އިކޮނޮމިކް ޒޯނެއް ކަނޑައަޅައި، 200 ހެކްޓަރުގެ ބިމެއްގައި ދަނޑުވެރިކަމުގެ ބިޔަ މަޝްރޫއެއް އިޢުލާންކޮށްފައެވެ. މި މަޝްރޫއުތަކުގެ ސަބަބުން ރާއްޖޭގެ ދަނޑުވެރިކަމުގެ ދާއިރާއަށް އިތުރު ކުރިއެރުންތަކެއް ލިބިގެންދާނެއެވެ.
