ގިނަ ދުވަސްތަކެއް ވަންދެން އިންތިޒާރު ކުރަމުން އައި ބުޅާ ފެސިލިޓީ "އޮޅު ހިޔާ" ގެ ހިދުމަތް އަންނަ މަހުގެ ފުރަތަމަ ހަފްތާގެ ތެރޭގައި ފެށޭނެކަމަށް މާލެ ސިޓީ ކައުންސިލުން ބުނެފިއެވެ.

މާލެ ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނެފައިވަނީ މި ފެސިލިޓީގެ އޮޕަރޭޝަން ފެށުމުގެ މަސައްކަތް މިހާރުވެސް ކުރިއަށްދާ ކަމަށެވެ. މިގޮތުން، މި ވަގުތު ކުރެވެމުންދަނީ ފެސިލިޓީއަށް ބޭނުންވާ މުވައްޒަފުންނާއި އެކިއެކި ތަކެތި ހޯދުމުގެ މަސައްކަތް ކަމަށް ވެސް ކައުންސިލުން ފާހަގަ ކޮށްފައި ވެއެވެ.

"އޮޅު ހިޔާ" އަށް ބޭނުންވާ ސާމާނު ހޯދުމަށް ކައުންސިލުން ވަނީ މިހާތަނަށް ތިން ފަހަރެއްގެ މަތިން އިޢުލާނު ކޮށްފައެވެ. އެންމެ ފަހުން މިކަމަށް އިޢުލާނު ކުރީ މިދިޔަ އާދީއްތަ ދުވަހުއެވެ. މި އިޢުލާނުގައި ހިމެނޭ ތަކެތީގެ ތެރޭގައި 3 ޔުނިޓް ވެޓެރިނަރީ އައިސީޔޫ ކޭޖާއި، 16 ޔުނިޓް ވެޓެރިނަރީ ކޭޖް، އަދި 2 ވައްތަރެއްގެ 20 ކެޓް ޓްރެޕް ހިމެނެއެވެ.

މި ފެސިލިޓީ ހުޅުވުމުން، މާލޭގެ މަގުމަތީގައި އުޅޭ ބުޅަލަށް ރައްކާތެރި މާޙައުލެއް ޤާއިމުކުރެވި، އަދި ބުޅަލުގެ އާބާދީ ކޮންޓްރޯލް ކުރުމަށް މަގު ފަހިވެގެން ދާނެއެވެ. މީގެ އިތުރުން، ބަލި ބުޅަލަށް ބޭސްފަރުވާ ކުރުމަށާއި، ބުޅާ ގެންގުޅެން ބޭނުންވާ ފަރާތްތަކަށް ބުޅާ ދޫކުރުމުގެ ހިދުމަތް ވެސް މި ފެސިލިޓީން ލިބޭނެ ކަމަށް ދަނޑުވެރިކަމާއި ދިރޭތަކެއްޗާބެހޭ ވުޒާރާއިން މީގެ ކުރިން ފާހަގަ ކޮށްފައި ވެއެވެ.