އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އިސްނެގުމުގެ މަތިން، ޔޫ.އެން އެސްކޭޕްގެ އޭޝިއަން އެންޑް ޕެސިފިކް ޓްރެއިނިންގް ސެންޓަރ ފޮރ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ފޮރ ޑިވަލޮޕްމަންޓް (އޭޕީސީއައިސީޓީ) އާއި ގުޅިގެން "އެމްޕަވަރިންގް ވިމެން އެންޓަޕްރެނަރސް ތްރޫ ޑިޖިޓަލް ޓްރާންސްފޮރމޭޝަން" ގެ ނަމުގައި ތަމްރީން ޕްރޮގްރާމެއް ހިންގުމަށް ނިންމައިފިއެވެ.
މި ޕްރޮގްރާމަކީ އަންހެން ވިޔަފާރިވެރިންނަށް އަމާޒުކޮށްގެން ހިންގޭ ޕްރޮގްރާމެއް ކަމަށާއި، މި ޕްރޮގްރާމުގައި ބައިވެރިވުމުގެ ފުރުޞަތު މިހާރު ވަނީ ހުޅުވާލެވިފައިވާ ކަމަށް ވުޒާރާއިން ބުންޏެވެ. ޕްރޮގްރާމުގައި ބައިވެރިވާުގައި ބައިވެރިވާން ބޭނުންވާ ފަރާތްތަކަށް https://forms.gle/Mz1wrLnWoV2ZCyQ89 މި ލިންކު މެދުވެރިކޮށް ރެޖިސްޓަރ ކުރެވޭނެ ކަމަށާއި، ރެޖިސްޓަރ ކުރެވޭނެ އެންމެ ފަހުގެ ތާރީޚަކީ ޑިސެމްބަރު މަހުގެ 7 ވަނަ ދުވަސް ކަމުގައި ވުޒާރާއިން ބުންޏެވެ.
އޭޕީސީއައިސީޓީގެ ވިމެން އައިސީޓީ ފްރޮންޓިއަރ އިނީޝިއޭޓިވްގެ ތެރެއިން ކުރިއަށް ގެންދާ މި ޕްރޮގްރާމް އަމާޒުކުރަނީ 100 އަންހެން ވިޔަފާރިވެރިންނަށެވެ. މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 3 ދުވަހަށް ބަހާލައިގެން، ޑިސެމްބަރު މަހުގެ 14 ވަނަ ދުވަހުން 16 ވަނަ ދުވަހުގެ ނިޔަލަށެވެ. ސެޝަންތައް ނަގައިދެއްވާނީ އިނގިރޭސި ބަހުން، އޭޕީސީއައިސީޓީގެ ފަންނީ މާހިރުންނެވެ. އަދި ޕްރޮގްރާމް ފުރިހަމަކުރާ ބައިވެރިންނަށް ސެޓްފިކެޓް ޙަވާލުކުރެވޭނެ ކަމަށް ވެސް ވުޒާރާއިން ބުންޏެވެ.
މި ޕްރޮގްރާމުގެ މަޤްޞަދަކީ އަންހެން ވިޔަފާރިވެރިންނަށް ވިޔަފާރި ކުރިއެރުވުމަށް ބޭނުންވާ މާލީ ހުނަރުތަކާއި، ޑިޖިޓަލް ވަސީލަތްތަކުގެ ބޭނުން ހިފުމުގެ ހުނަރު ދަސްކޮށްދިނުމެވެ. މީގެ ތެރޭގައި ފައިނޭންޝަލް ލިޓްރެސީ، ފައިދާ އަދި ގެއްލުން ހިސާބުކުރުން، އިންވެސްޓްމަންޓް ކުރުން، އަދި ފައިނޭންޝަލް ބުކްކީޕިންގް ފަދަ ދާއިރާތަކުން މަޢުލޫމާތު ފޯރުކޮށްދިނުން ހިމެނެއެވެ.
ވުޒާރާއިން ބުނީ، މި ޕްރޮގްރާމުގެ ސަބަބުން އަންހެން ވިޔަފާރިވެރިންނަށް އީ-ކޮމާސް އަދި ޑިޖިޓަލް މާކެޓިންގ ފަދަ ސުމޭކު ވަސީލަތްތައް ބޭނުންކޮށްގެން އާ މާކެޓްތަކަށް ވަދެ، އާމްދަނީ އިތުރުކުރުމުގެ ފުރުޞަތު ލިބިގެންދާނެއެވެ. އަދި ޑިޖިޓަލައިޒޭޝަނުގެ ޒަރީޢާއިން މުދާ ބެލެހެއްޓުމާއި، ޚަރަދުތައް ކުޑަކުރުމާއި، ކަސްޓަމަރުންނާއި ގުޅުން ބަދަހިކުރުމަށް މަގުފަހިވެގެންދާނެއެވެ.
ވުޒާރާއިން ބާރުއަޅުއްވަނީ ޝަރުޠު ހަމަވާ ހުރިހާ އަންހެން ވިޔަފާރިވެރިން މި ފުރުޞަތުގެ ބޭނުން ހިފުމަށެވެ. މި ޕްރޮގްރާމުގައި ބައިވެރިވުމަކީ އަންހެން ވިޔަފާރިވެރިންނަށް އެމީހުންގެ ވިޔަފާރި ކުރިއަރުވައި، އިޤްތިޞާދީ ގޮތުން ބާރުވެރިވުމަށް ލިބޭ މުހިންމު ފުރުޞަތެއް ކަމުގައި ވުޒާރާއިން ފާހަގަކުރިއެވެ.
