ދިވެހިރާއްޖެ ވަނީ ވިދިވިދިގެން ފަސްވަނަ ފަހަރަށް "ދުނިޔޭގެ އެންމެ މޮޅު މަންޒިލު"ގެ މަޤާމު ހޯދުމުގެ އިތުރުން، އިއްޔެ ޕޯޗުގަލްގެ މަދެއިރާގައި ބޭއްވުނު ވޯލްޑް ޓްރެވަލް އެވޯޑްސް ގްރޭންޑް ފައިނަލް ގާލާ ސެރެމަނީގައި "ދުނިޔޭގެ އެންމެ މޮޅު ގްރީން މަންޒިލު"ގެ މަޤާމު ވެސް ހާސިލުކޮށްފައިވެއެވެ.
ޓޫރިޒަމް މިނިސްޓްރީގެ ޕްރެސް ރިލީހުގައި ފާހަގަކޮށްފައިވާ ގޮތުގައި، މިއަހަރުގެ ކުރީކޮޅު ދުބާއީގައި ބޭއްވުނު އަރަބިއަން ޓްރެވަލް މާކެޓް (އޭޓީއެމް) 2024 ގައި އޮތް ވޯލްޑް ޓްރެވަލް އެވޯޑްސް (އިންޑިއަން އޯޝަން ކެޓަގަރީ) ގައި ފާހަގަކޮށްލެވޭ ކާމިޔާބީތަކެއް ހޯދާފައެވެ. އެ ސަރަޙައްދީ ޙަފްލާގައި ދިވެހިރާއްޖެއަށް ލިބުނީ "އިންޑިއަން އޯޝަންގެ އެންމެ މޮޅު މަންޒިލު"، "އެންމެ މޮޅު މުނިފޫހިފިލުވުމުގެ މަންޒިލު"، "އެންމެ މޮޅު ގްރީން މަންޒިލު"، އަދި "އެންމެ މޮޅު ޑައިވިންގ މަންޒިލު"ގެ މަޤާމުތަކެވެ.
ވަޒީރު އިބްރާހީމް ފައިޞަލް ވިދާޅުވީ މި ކާމިޔާބީތަކަކީ ފަތުރުވެރިކަމުގެ ދާއިރާގައި ހިމެނޭ އެންމެހައި ފަރާތްތަކުގެ ގުޅިގެން ކުރި މަސައްކަތުގެ ނަތީޖާ ކަމަށެވެ. މީގެ ތެރޭގައި ހޮޓާތަކާއި، ޑައިވް އޮޕަރޭޓަރުންނާއި، އެއަރލައިންތަކާއި، ޓްރެވަލް އޭޖެންސީތަކާއި، ހޮސްޕިޓަލިޓީ މުވައްޒަފުންނާއި، ޓުއަރ ގައިޑުންނާއި، އަދި ރަށްރަށުގެ މުޖުތަމަޢުތައް ހިމެނެއެވެ.
Advertisement
މިނިސްޓްރީ އޮފް ޓޫރިޒަމްއިން ދަނީ އިތުރު ކުރިއެރުން ހޯދުމަށާއި، އެންމެ މޮޅު މަންޒިލެއްގެ ގޮތުގައި ޤައުމުގެ ނަން މަޝްހޫރުކުރުމަށާއި، އަދި އަންނަން އޮތް ޖީލުތަކަށް ޓަކައި ޤައުމުގެ ޤުދުރަތީ އަދި ޘަޤާފީ މުއްސަނދިކަން ރައްކާތެރިކުރުމަށް އަމާޒުކޮށްގެން މަސައްކަތްކުރަމުންނެވެ.
ވަޒީރު ފައިޞަލް އިތުރަށް ވިދާޅުވި ގޮތުގައި، މި ޝަރަފުތަކުން ދައްކުވައިދެނީ ދިވެހިރާއްޖޭގެ ބައިނަލްއަޤްވާމީ ފެންވަރުގެ ކާމިޔާބީގެ ފަހަތުގައިވާ އެންމެންގެ ޝައުޤުވެރިކަމާއި، އީޖާދުކުރުމާއި، އަދި ތިމާވެށި ރައްކާތެރިކުރުމަށް ކުރާ މަސައްކަތެވެ. އަދި މިއިން ކަށަވަރުކޮށްދެނީ ފަތުރުވެރިކަމުގެ ދާއިރާގައި ދިވެހިރާއްޖެއަކީ ދުނިޔޭގެ ކުރީ ސަފުގައި ހިމެނޭޤައުމެއްކަމާއި، ޤައުމުގެ ދެމިގެންދާ ކާމިޔާބީތަކާއި މުސްތަޤުބަލަށް ކުރާ އުންމީދުތަކެވެ.
ޓޫރިޒަމް މިނިސްޓްރީގެ ޕްރެސް ރިލީހުގައި އިތުރަށް ފާހަގަކޮށްފައިވާ ގޮތުގައި، މި ކާމިޔާބީތަކުން ދައްކުވައިދެނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރުވިސްނުންތެރި ސިޔާސަތުތަކެވެ. އެމަނިކުފާނުގެ ދެމެހެއްޓެނިވި އަޒުމުގެ ސަބަބުން ދިވެހިރާއްޖޭގެ ފަތުރުވެރިކަމުގެ ދާއިރާ ދަނީ ދެމެހެއްޓެނިވި ގޮތެއްގައި އަދި ވިލުންވެރިކަމާއެކު ކުރިއަރަމުންނެވެ.
"ދުނިޔޭގެ އެންމެ މޮޅު ގްރީން މަންޒިލު"ގެ މަޤާމު ހޯދުމަކީ ޤައުމަށް ލިބުނު ތާރީޚީ ކާމިޔާބީއެކެވެ. މިއިން ހާމަކޮށްދެނީ ޤުދުރަތީ ވެށި ރައްކާތެރިކުރުމަށާއި ދެމެހެއްޓެނިވި ފަތުރުވެރިކަމުގެ އުސޫލުތައް ކުރިއެރުވުމަށް ދިވެހިރާއްޖެއިން ކުރަމުންދާ މަސައްކަތުގެ ފުރިހަމަކަމެވެ.
