އާރުޑީސީގެ މަހެއްގެ ޚަރަދު 18-20 މިލިއަން ރުފިޔާއަށް ކުޑަކުރެވިފައިވާކަމަށް އެ ކުންފުނީގެ މެނޭޖިން ޑިރެކްޓަރ ބްރިގޭޑިއަރ ޖެނެރަލް ރިޓަޔަރޑް ޢަލީ ޒުހައިރު ވިދާޅުވެއްޖެއެވެ. އޭނާ މިހެން ވިދާޅުވީ، ޕީއެސްއެމް ނިއުސްއިން ގެނެސްދޭ ހަފްތާ 52 ޕްރޮގްރާމްގައި ވާހަކަދައްކަވަމުންނެވެ.

މިދިޔަ ސަރުކާރުގައި އާރުޑީސީގެ ޚަރަދުތައް ވަރަށް ބޮޑަށް އިތުރުވެފައިވާކަމަށާއި، ކުންފުނީގެ އާމްދަނީއާއި ނުބައްދަލު މިންވަރަށް ޚަރަދު ކުރަމުން ދިޔަކަމަށް އޭނާ ފާހަގަކުރެއްވިއެވެ. މިސަރުކާރުން ވެރިކަމާއި ހަވާލުވުމަށްފަހު، ކުންފުނި ރިފޯމް ކުރުމުގެ މަސައްކަތް ފެށިކަމަށާއި، އެގޮތުން ކުންފުނީގެ ބޯޑާއި ޕީސީބީއާ މަޝްވަރާކުރެވިގެން މި މަސައްކަތް ކުރިއަށް ގެންދިޔަކަމަށް ޢަލީ ޒުހައިރު ވިދާޅުވިއެވެ.

"އެގޮތުން މަސައްކަތްކޮށްގެން އަޅުގަނޑުމެންނަށް ޚަރަދު ވަރަށް ބޮޑުތަނެއް ކުޑަކުރެވުނު. މަހެއްގެ މައްޗަށް ކުރާ ޚަރަދުގެ 18 އާއި 20 މިލިއަނާއި ދެމެދު ޚަރަދު އަޅުގަނޑުމެންނަށް މަހެއްގެ މައްޗަށް ކުޑަކުރެވިގެން ދިޔަ." ބްރިގޭޑިއަރ ޖެނެރަލް ރިޓަޔަރޑް ޢަލީ ޒުހައިރު ވިދާޅުވިއެވެ.

ކުންފުނީގެ ޚަރަދު ކުޑަކުރުމަށްޓަކައި އިތުރު ގަޑި ލިބޭ ގޮތުގެ ކޮންޓްރޯލް މެކޭނިޒަމެއް ކަނޑައެޅުނު ކަމަށާއި، އަދި އާރުޑީސީއަކީ ރަސްމީކޮށް 6 ދުވަހު މަސައްކަތްކުރާ ކުންފުންޏެއްގެ ގޮތުގައި ބަދަލުކޮށްފައިވާ ކަމަށްވެސް އޭނާ ވިދާޅުވިއެވެ.

މީގެ އިތުރުން، މިސަރުކާރުން ވެރިކަމާއި ހަވާލުވިއިރު ހުއްޓިފައިވާ 17 ޕްރޮޖެކްޓެއް މިހާރު ފަށައިގެން ކުރިއަށްދާކަމަށާއި، އިތުރު 10 ޕްރޮޖެކްޓެއްގެ މަސައްކަތްވެސް ކުރިއަށްދާކަން އާރުޑީސީގެ މެނޭޖިން ޑިރެކްޓަރ ފާހަގަކުރެއްވިއެވެ.

އާރުޑީސީގެ މެނޭޖިން ޑިރެކްޓަރ އިތުރަށް ވިދާޅުވީ، ކުންފުނި ރިފޯމް ކުރުމުގެ މަސައްކަތުގެ ދަށުން ކުރި އެންމެ މުހިންމު އެއްކަމަކީ ހިންގުމުގެ ޚަރަދު ކުޑަކުރުން ކަމަށެވެ. އެގޮތުން ކުންފުންޏަށް ތަކެތި ގަންނާނެ ވަކި އަގުތަކެއް ކަނޑައެޅިގެން ދިޔަކަމަށް ވެސް އޭނާ ފާހަގަކުރެއްވިއެވެ.