އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގު މިއަދު އެ މަޤާމުން ވަކިވެއްޖެއެވެ. ފުއާދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މިއަދަކީ އިލެކްޝަންސް ކޮމިޝަނުގައި އޭނާގެ ދައުރުގެ އެންމެ ފަހު ދުވަސްކަމަށެވެ.

ފުއާދު އިތުރަށް ވިދާޅުވެފައިވަނީ، އިންތިގާލީ އީސީ އާއި 1 ވަނަ އީސީގައި ތިއްބެވި ބޭފުޅުން ވެސް ހިމެނޭ ގޮތަށް މަސައްކަތް ކުރެއްވި ހުރިހާ މެމްބަރުންނަށާއި މުވައްޒަފުންނަށް ޝުކުރު އަދާކުރައްވާ ކަމަށެވެ. އަދި ރައީސްކަމުގެ މަޤާމުގައި ހުންނެވިއިރު، ސިޔާސީ ޕާޓީތަކަށާއި މުއައްސަސާތަކާއި، ރައްޔިތުން ދެއްވި އިތުބާރާއި އެއްބާރުލުމަށް ޝުކުރު ދަންނަވާ ކަމަށް ވެސް ފުއާދު ވިދާޅުވެފައިވެއެވެ.

ފުއާދުގެ ދައުރު މިއަދު ހަމަވުމާ ގުޅިގެން، އީސީގެ މެމްބަރުކަމަށް އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުލް ހަސީބް އިސްމާއިލް އައްޔަން ކުރުމަށް މަޖިލީހަށް ވަނީ ފޮނުވާފައެވެ. މި މައްސަލަ މިހާރު ވަނީ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ފޮނުވާފައެވެ.

އިލެކްޝަންސް ކޮމިޝަންގެ ގަވާއިދުގައިވާ ގޮތުން، އެ ކޮމިޝަންގެ މެންބަރުކަމުގައި ދެ ދައުރަށް ވުރެ އިތުރަށް ނުހުރެވޭނެއެވެ. ފުއާދު އީސީގެ މެމްބަރުކަމަށް އެންމެ ފުރަތަމަ އައްޔަން ކުރެވުނީ 2008 ވަނަ އަހަރުއެވެ.