ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަން އެމްޑީޕީގެ ކެންޑިޑޭޓް އަބްދުﷲ ސޯދިގު (ސޯބެ) ކާމިޔާބުކޮށްފިއެވެ. ސޯބެ މި ގޮނޑި ކާމިޔާބުކުރެއްވީ ސަރުކާރު ހިންގާ ޕީއެންސީގެ ކެންޑިޑޭޓް އަހްމަދު ސައީދު (ސޮޑާ) އާ ވާދަކޮށް ވަރަށް ހަނި ތަފާތަކުންނެވެ.

މި އިންތިހާބުގެ ވަގުތީ ނަތީޖާ ދައްކާގޮތުން ސޯބެ މި ގޮނޑި ކާމިޔާބުކުރެއްވީ 62 ވޯޓުގެ ފަރަގަކުންނެވެ. އިންތިހާބުގެ ޖުމްލަ ނަތީޖާއިން ސޯބެ ކުރިހޯއްދެވި ނަމަވެސް، ވޯޓުލީ ގިނަ ފޮށިތަކުގެ ކުރީގައި އޮތީ ޕީއެންސީގެ ކެންޑިޑޭޓް ސޮޑާއެވެ. އެގޮތުން މި ދާއިރާއަށް ބެހެއްޓި 7 ވޯޓު ފޮށީގެ ތެރެއިން 4 ފޮށި ކާމިޔާބުކުރީ ސޮޑާއެވެ.

ހާއްސަކޮށް ހިތަދޫގައި ބެހެއްޓި ވޯޓު ފޮށިތަކުގެ ނަތީޖާއަށް ބަލާއިރު، އެ ރަށުން ކުރި ހޯއްދަވާފައިވަނީ ސޮޑާއެވެ. ހިތަދޫ ފޮށިތަކުން ސޮޑާއަށް 958 ވޯޓު ލިބިފައިވާއިރު، ސޯބެއަށް ލިބިވަޑައިގަތީ 924 ވޯޓެވެ.

ނަމަވެސް، ސޯބެއަށް އިންތިހާބު ކާމިޔާބުވުމުގައި އެންމެ ބޮޑު އެހީތެރިކަމެއް ލިބުނީ މާލޭގައި ބެހެއްޓި ވޯޓު ފޮށިންނެވެ. މާލޭ ފޮށީގެ ނަތީޖާ ދައްކާގޮތުން ސޯބެއަށް 451 ވޯޓު ލިބިވަޑައިގަތްއިރު، ސޮޑާއަށް ލިބިވަޑައިގަތީ 355 ވޯޓެވެ. މާލޭ ފޮށިން ސޯބެ ހޯއްދެވި ބޮޑު ތަފާތާއެކު އިންތިހާބުގެ ޖުމްލަ ނަތީޖާ ވަނީ ސޯބެގެ ކޮޅަށް އެނބުރިފައެވެ.

މި އިންތިހާބަކީ ދާއިރާގެ ގޮނޑި ހުސްވުމާ ގުޅިގެން ބޭއްވުނު ފޯރިގަދަ ބައި އިލެކްޝަނެކެވެ. އިންތިހާބުގެ ރަސްމީ ނަތީޖާ އިލެކްޝަންސް ކޮމިޝަނުން ކުރިއަށް އޮތް ވަގުތުތަކުގައި އިއުލާން ކުރާނެއެވެ.