ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑިއަށް މެންބަރަކު އިންތިހާބު ކުރުމަށްޓަކައި މިއަދު ބާއްވާ ބައި-އިލެކްޝަންގެ ވޯޓުލުން ފަށައިގެން ކުރިއަށްދާއިރު، މިހާތަނަށް 530 މީހުން ވޯޓުލާފައިވާ ކަމަށް އިލެކްޝަންސް ކޮމިޝަނުން ހާމަކޮށްފިއެވެ.

މިއަދު ހެނދުނު 08:00 ގައި ފެށި މި ވޯޓުލުން މިއަދު ހަވީރު 16:00 އާ ހަމައަށް ކުރިއަށްދާނެއެވެ. މި އިންތިހާބުގައި ވޯޓުލުމުގެ ހައްގު ޖުމްލަ 4,121 މީހުންނަށް ލިބިގެންވާ ކަމަށް އިލެކްޝަންސް ކޮމިޝަނުގެ ތަފާސްހިސާބުތަކުން ދައްކައެވެ.

މި ބައި-އިލެކްޝަނުގައި ވާދަކުރައްވަނީ ދެ ޕާޓީއެއްގެ ކެންޑިޑޭޓުންނެވެ. އެއީ ސަރުކާރު ހިންގާ ޕީއެންސީގެ ފަރާތުން އަހްމަދު ސައީދު (ސޮޑާ) އަދި އިދިކޮޅު އެމްޑީޕީގެ ފަރާތުން އަބްދުﷲ ސޯދިގު (ސޯބެ) އެވެ.

ވޯޓުލުމުގެ އިންތިޒާމުތައް ހަމަޖައްސާފައިވާ ގޮތަށް ބަލާއިރު، މާލެ ސިޓީގައި ދިރިއުޅޭ މި ދާއިރާގެ ރައްޔިތުންނަށް ވޯޓުލުމަށްޓަކައި ދަރުމަވަންތަ ސްކޫލުގައި ދެ ވޯޓު ފޮށްޓެއް ވަނީ ބަހައްޓާފައެވެ. އަދި ހިތަދޫގައި މި އިންތިހާބަށް ހާއްސަކޮށް ފަސް ވޯޓު ފޮށްޓެއް ވަނީ ބަހައްޓާފައެވެ.

ހިތަދޫ އުތުރު ދާއިރާގެ މަޖިލިސް ގޮނޑި ހުސްވެފައިވަނީ، 2024 ވަނަ އަހަރު ބޭއްވި ރަސްމީ އިންތިހާބުގައި އެ ދާއިރާއަށް އިންތިހާބުވި މުހައްމަދު ސިނާންގެ ސާބިތު ދަރަންޏެއް އޮތްކަން ސާބިތުވެ، އެ ދަރަނި ހުކުމާ އެއްގޮތަށް ނުދައްކާކަން ކޯޓަށް ސާބިތުވުމާ ގުޅިގެންނެވެ. އެ މައްސަލައިގައި ސުޕްރީމް ކޯޓުން ކުރި ހުކުމާއެކު އޭނާގެ މެންބަރުކަމުގެ ޝަރުތު އުނިވެ، ގޮނޑި ވަނީ ހުސްވެފައެވެ.