މާލޭ ސަރަޙައްދަށް ހަތަރު ފުރޮޅުލީ އުޅަނދު ރަޖިސްޓަރީކުރުމުގެ ނިސްބަތް 74.1% ދަށްވެފައިވާކަމަށް ޓްރާންސްޕޯޓް މިނިސްޓްރީން ބުނެފިއެވެ.

ޓްރާންސްޕޯޓް މިނިސްޓްރީން ބުނީ އެ މިނިސްޓްރީގެ ތަފާސްހިސާބުތަކުން ދައްކާ ގޮތުން 2023 ވަނަ އަހަރާއި އަޅާބަލާއިރު 2024 ވަނަ އަހަރު (އޮކްޓޯބަރު މަހުގެ 31 ގެ ނިޔަލަށް) މާލެ ސަރަޙައްދަށް ރަޖިސްޓްރީކުރެވުނު ހަތަރު ފުރޮޅުލީ އުޅަނދު ރަޖިސްޓްރީކުރުމުގެ ނިސްބަތް %74.1 ދަށްވެފައިވާ ކަމަށެވެ.

މިނިސްޓްރީން ބުނީ ދެ ފުރޮޅުލީ އުޅަނދު ރަޖިސްޓްރީކުރުމުގެ ނިސްބަތްވެސް %8.1 މަދުވެފައިވާ ކަމަށެވެ.

ޤާނޫނާއި ޤަވާޢިދުގެ ތެރެއިން ނޫންގޮތަކަށް އެއްގަމު އުޅަނދު ރަޖިސްޓްރީކުރުން މިހާރު ނިމުމަމަކަށް ގެނެވިފައިވާ ކަމަށް މިނިސްޓްރީން ބުންޏެވެ. އަދި ގަރާޖުގެ ޞައްޙަކަން ކަށަވަރުކުމުގެ މުހިންމު މަސައްކަތްތައްވެސް މިނިސްޓްރީން ފަށާފައިވާކަމަށް ބުންޏެވެ.

މިނިސްޓްރީން ބުނީ މި މަސައްކަތުގެ މައިގަނޑު މަޤްޞަދަކީ ހަތަރު ފުރޮޅުލީ އުޅަނދު ރަޖިސްޓްރީ ކުރުމުގައި ޤާނޫނައި ޤަވާޢިދުގެ ތެރެއިން މިނިސްޓްރީގެ ޒިންމާ އަދާކުރުމަށާއި އަދި އުސޫލުން ބޭރުން ރަޖިސްޓްރީވަމުން ދިޔުން ނިމުމަކަށް ގެނައުން ކަމަށެވެ.

މި ބަދަލުތަކުގެ ނަތީޖާއެއްގެ ގޮތުން މާލެ ސަރަޙައްދަށް އެއްގަމު އުޅަނދު އިތުރުވަމުން ދިޔަ މިންވަރު ވަރަށް ބޮޑުތަކުން ދަށްވެފައިވާކަމަށް މިނިސްޓްރީން ބުންޏެވެ. އަދި މި ފިޔަވަޅުތަކަކީ މާލޭގެ ޓްރެފިކް ޙާލަތު ރަނގަޅުކުރުމަށް އެޅުނު މުހިންމު ފިޔަވަޅުތަކެއް ކަމަށްވެސް މިނިސްޓްރީން ފާހަގަކުރިއެވެ.

މިދިޔަ ސަރުކާރުގައި ޓްރާންސްޕޯޓް މިނިސްޓްރީން ޚިދުމަތްތައް ދިނުމުގައި ކޮރަޕްޝަނާއި ނުފޫޒުގެ ތުހުމަތު ބޮޑުވެ، އެ މިނިސްޓްރީގެ މަސައްކަތްތައް އޮޑިޓްކުރަންވެސް ޖެހުނެއެވެ. ވެހިކަލް ރަޖިސްޓްރީ އާއި ލައިސަންސް ދޫކުރުންފަދަ ޚިދުމަތްތަކުގައި އުސޫލާ ޚިލާފަށް ފައިސާ ނަގައި، ބޮޑެތި ކޮރަޕްޝަނުގެ ޢަމަލުތައް އެ މިނިސްޓްރީން ހިންގާފައިވާކަން އޭރު ވަނީ ފަޅާއަރާފައެވެ.

އެފަދަ އެއްވެސް ކަމެއް މި ސަރުކާރުގައި ކުރުމުގެ ފުރުޞަތު ނޯންނާނެ ކަމުގެ ޔަޤީންކަން އަދުގެ ޓްރާންސްޕޯޓް މިނިސްޓަރ މުޙައްމަދު އަމީން ވަނީ ދެއްވާފައެވެ.