ސަރުކާރަށް އެއް އަހަރު ފުރުމާއި ގުޅިގެން، ސަރުކާރުގެ މަސައްކަތްތަކާއި މެދު ފަޚުރުވެރިވާ ކަމަށް ބުނެ ޕްރޮގްރެސިވް ޕާޓީ އޮފް މޯލްޑިވްސް (ޕީއެންސީ) އިން ބަޔާނެއް ނެރެފިއެވެ.
ސަރުކާރުގެ މަސައްކަތްތަކަށް ޝުކުރު އަދާކޮށް ޕީއެންސީން ނެރުނު ބަޔާނުގައި ބުނެފައިވަނީ ރައީސް ޑރ. މުޙައްމަދު މުޢިއްޒުގެ ސަރުކާރުން ވޭތުވެދިޔަ އަހަރު ދުވަހު ޤައުމު ހިންގާފައިވަނީ ޒިންމާދާރުކަމާއެކު، މާލިއްޔަތަށް އަމާނާތްތެރިވެ، ހާމަކަން ބޮޑު ގޮތެއްގައެވެ. އަދި ރައްޔިތުންނަށް ހުރިހާ މަޢުލޫމާތެއް ފޯރުކޮށްދީފައިވާ ކަމަށްވެސް ބަޔާނުގައި ބުނެފައިވެއެވެ.
މީޑިއާގެ މިނިވަންކަމަށް އިޙްތިރާމްކުރާ ކަމުގެ ހެއްކެއްގެ ގޮތުގައި، މިދިޔަ އަހަރު ތެރޭގައި ނޫސްވެރިންނަށް ދަތިކޮށް ފިޔަވަޅު އަޅާފައި ނުވާ ކަމަށާއި، 70 އަށްވުރެ ގިނަ ނޫސްވެރިންގެ ބައްދަލުވުން ބާއްވާފައިވާ ކަމަށް ޕީއެންސީން ފާހަގަކޮށްފައި ވެއެވެ.
Advertisement
އަދި މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ހުށަހެޅޭ އާރްޓީއައި ހުށަހެޅުންތަކަށް ޖަވާބުދިނުމުގައި މި ސަރުކާރުން ކުރީ ސަރުކާރާއި ޚިލާފަށް، އިހުމާލުވެފައި ނުވާ ކަމަށްވެސް ބަޔާނުގައި ބުނެފައިވެއެވެ.
މާލީ ދާއިރާއަށް ބަލާއިރު، ސަރުކާރުން އަޅާފައިވާ ހަރުދަނާ ފިޔަވަޅުތަކުގެ ސަބަބުން ކޮންމެ އަހަރަކު ބޮޑުވަމުންދިޔަ ދަރަނީގެ އިންސައްތަ 15 އިން 2.5 އަށް ދަށްކުރެވިފައިވާ ކަމަށް ޕީއެންސީން ފާހަގަކޮށްފައިވެއެވެ.
މީގެއިތިރުން، ކުރީގެ ސަރުކާރުން މާލީ ކަންކަން އޮޅުވާލާފައި އޮތުމުގެ ސަބަބުން އެ އޮޅުންފިލުވުމަށް ވަގުތު ނެގުނު ނަމަވެސް، މިހާރު މާލީ ހިސާބުތައް ޤަވާޢިދުން ހާމަކުރަމުންދާ ކަމަށް އެ ބަޔާނުގައި ބުނެފައިވެއެވެ.
