ޅ. ކުރެންދޫގެ 104 ގެއަކަށް ފެންވަދެ ބޮޑެތި ގެއްލުންތަކެއް ލިބިފައިވާ ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭއިން ބުނީ މިހާރު ރާއްޖެއަށް ކުރަމުން އަންނަ ވިއްސާރައާއި ގުޅިގެން ދެކުނުގެ އަތޮޅުތަކަށާއި މެދުރާއްޖެތެރެ އަދި އުތުރުގެ ބައެއް އަތޮޅުތަކަށް ވިއްސާރައިގެ އަސަރުކޮށްފައިވާ ކަމަށެވެ. މި ވިއްސާރައާއި ގުޅިގެން އަތޮޅުތަކުގެ ޙާލަތު ބެލުމާއި އެހީތެރިކަން ބޭނުންވާ ފަރާތްތަކަށް ބޭނުންވާ އެހީތެރިކަން ކައުންސިލްތަކާއި ގުޅިގެން ފޯރުކޮށްދެމުން އަންނަ ކަމަށް އެ އޮތޯރިޓީން ބުންޏެވެ.

އެގޮތުން ޅ. ކުރެންދޫއަށް އިއްޔެ ކުރި ވިއްސާރައިގައި ރަށުތެރޭ އެއްކޮށް ފެންބޮޑުވެ، ރަށުގައި ހުރި ޕަންޕު ބޭނުންކޮށްގެންނާއި ކޯރު ކަނޑައިގެން ފެން ހިންދުމުގެ މަސައްކަތް ކޮށްފައިވާ ކަމަށް އެންޑީއެމްއޭއިން ބުންޏެވެ. އަދި ރަށުގައި ބޮޑެވެފައިވާ ފެންގަނޑު ނޮދާން އޭރިއާ ކޮމާންޑުގެ ސިފައިންގެ އެހީތެރިކަމާއެކު ރޭގެ 12 ޖެހުމާއި ހަމައަށް ހިންދާލެވިފައިވާ ކަމަށް އެންޑީއެމްއޭއިން ބުންޏެވެ.

^{އިއްޔެ ކުރި ވިއްސާރައިގައި ލިބުނު ގެއްލުންތައް. / ފޮޓޯ: އެންޑީއެމްއޭ}

އެންޑީއެމްއޭއިން ބުނީ ފެންބޮޑުވެ ގެއްލުން ލިބުނު ގެތަކުގެ ތެރެއިން ދިރިނޫޅެވޭ ފަދަ ޙާލަތަށް ގޮސްފައިވާ ގެތައް ދެނެގަނެ އެ ފަރާތްތަކަށް ބޭނުންވާ ވަގުތީ ބޯހިޔާވަހިކަމާއި ކެއުންބުއިމުގެ އެހީތެރިކަން ފޯރުކޮށްދިނުމުގެ މަސައްކަތް އެ އޮތޯރިޓީން ރަށު ކައުންސިލާއި ގުޅިގެން ކޮށްފައިވާ ކަމަށެވެ.

މި ޙާދިސާގައި 104 ގެއަކަށް ފެންވަދެ ބޮޑެތި ގެއްލުންތަކެއް ލިބިފައިވާތީ، ލިބިފައިވާ ގެއްލުންތައް ދެނެގަތުމުގެ މަސައްކަތް ކައުންސިލުން މިހާރު ކުރަމުން އަންނަ ކަމަށް އެންޑީއެމްއޭއިން ބުންޏެވެ.

އެންޑީއެމްއޭއިން ބުނީ މިހާރު ރާއްޖެއަށް ކުރަމުން އަންނަ ވިއްސާރައިގައި ގެއްލުން ލިބިގެން އެ އޮތޯރިޓީއަށް ރިޕޯޓުކޮށްފައިވަނީ ސ. ފޭދޫ، ޅ. ކުރެންދޫ، ދ. ބަނޑިދޫ އަދި ދ. ހުޅުދެލިން ކަމަށެވެ. އަދި މިވަގުތު ރާއްޖޭގެ އެހެން އަތޮޅުތަކުގެ ޙާލަތު ރަނގަޅުކަން ފާހަގަކުރެވިފައިވާ ކަމަށް އެންޑީއެމްއޭއިން ބުންޏެވެ.

ވިއްސާރައާ ގުޅިގެން ލިބޭ ގެއްލުންތައް ކުޑަކުރުމަށްޓަކައި ރައްކާތެރިކަމުގެ ފިޔަވަޅުތައް އެޅުމަށް އެ އޮތޯރިޓީން ވަނީ އިލްތިމާސްކޮށްފައެވެ.

މީގެ އިތުރުން އެ އޮތޯރިޓީން ވަނީ ކަނޑު ދަތުރުކުރާ ފަރާތްތަކުން މޫސުމަށް ޚާއްސަ ސަމާލުކަމެއް ދިނުމަށް އިލްތިމާސްކޮށްފައެވެ. އަދި ދަތުރަށް ނުކުންނަ އިރު ސަލާމަތީ ކަންކަމާއި މުވާސަލާތީ ނިޒާމް ފުރިހަމަކަން ޔަޤީން ކުރުމަށްވެސް އެ އޮތޯރިޓީން ވަނީ އިރުޝާދުދީފައެވެ.