ރާއްޖެއަށް މަސްތުވާތަކެތި އެތެރެކުރި އިންޑިއާ ދެމަފިރިންގެ ބަންދަށް އިތުރު 30 ދުވަސް ޖަހައިފިއެވެ.

މަސްތުވާތަކެއްޗާއެކު އިންޑިއާއަށް ނިސްބަތްވާ މުހައްމަދު ޝޯއިބް، 41 އާއި އޭނާގެ އަންހެނުން އައިޝާ، 38 ހައްޔަރުކޮށްފައިވަނީ ވެލާނާ އިންޓަރނޭޝަނަލް އެއަރޕޯޓުންނެވެ. މި ދެމީހުން ހައްޔަރުކޮށްފައިވަނީ ރާއްޖެއަށް މަސްތުވާތަކެތި ޓްރެފިކް ކުރުމުގެ ކުށުގައެވެ.

ކްރިމިނަލް ކޯޓުން މީގެ ކުރިންވެސް ވަނީ އެ ދެމަފިރިންގެ ބަންދަށް މުއްދަތު ޖަހާފައެވެ. އަދި އިއްޔެ މުއްދަތު ޖަހާފައިވަނީ އިތުރު 30 ދުވަހަށް އެ ދެމަފިރިން ބަންދު ކުރުމަށެވެ.

ކްރިމިނަލް ކޯޓުގައި ފުލުހުން ބުނެފައިވަނީ އެ ދެމަފިރިން ރާއްޖެ އައި އިރު އެ މީހުންގެ ލަގެޖުގެ ތެރެއިން ދެ ކިލޯގެ މަސްތުވާތަކެތި ފެނިފައިވާ ކަމަށެވެ.

ކޯޓު އަމުރުގައި ބަޔާންކޮށްފައިވާ ގޮތުގައި، އެ ދެމީހުންގެ މައްޗަށް ތުހުމަތުކުރެވޭ ކުށް ކުރިކަން ދައްކުވައިދޭ ކޮންމެވެސް މިންވަރެއްގެ ހެކި ގަރީނާ ހުށަހަޅާފައިވެއެވެ. ނަމަވެސް، ދެމަފިރިން ދަޢުވާއާ ދެކޮޅު ހަދައި، އެ މަސްތުވާތަކެއްޗަކީ އެމީހުންނާ ގުޅުން ހުރި އެއްޗެއް ނޫން ކަމަށް ވަނީ ބުނެފައެވެ.