ރަޝިޔާގެ އެތެރޭގައިވާ އަސްކަރީ ބޭސްތަކާއި ހަތިޔާރުގެ ކާރުޚާނާތައްފަދަ ޙައްސާސް ތަންތަނަށް ހަމަލާދިނުމުގެ ހުއްދަ އެމެރިކާގެ ރައީސް ޖޯ ބައިޑެން ޔުކްރެއިންއަށް ދެއްވާފައިކަމަށް ނަން ހާމަކުރަން ބޭނުންނުވާ އެމެރިކާގެ ދެ މަސްއޫލުވެރިއަކު ބުނެފިއެވެ.

ޔުކްރެއިންއަށް މި ހުއްދަ ދިނުމާއި ގުޅިގެން ރަޝިޔާގެ ޕާލަމެންޓުގެ ބައެއް މެންބަރުން ވަނީ ޔުކްރެއިނުން ހުޅަނގުގެ ހަތިޔާރު ބޭނުންކޮށްގެން ރަޝިޔާގެ އެތެރެއަށް ހަމަލާދާދޭން ފަށައިފިނަމަ، ރަޝިޔާއާއި އެމެރިކާއާ ދެމެދު ސީދާ އަސްކަރީ ކުރިމަތިލުމެއް ހިނގާނެ ކަމަށް ބުނެ އެމެރިކާއަށް އިންޒާރު ދީފައެވެ. ޔުކްރެއިންގެ ރައީސް ޒެލެންސްކީ ވަނީ ބައިޑެން މި ހުއްދަ ދެއްވިކަން ނުސީދާ ގޮތެއްގައި ހާމަކުރައްވާފައެވެ. އޭނާ ވިދާޅުވި ގޮތުގައި ގޮތުގައި ރަޝިޔާއާ ދެކޮޅަށް މުނާސަބު ފިޔަވަޅުތަކެއް އެޅުމުގެ ފެހި ސިގްނަލް މިހާރު ލިބިފައިވުމަކީ ޔުކްރެއިންގެ ހިތްހަމަ ޖެހުމެކެވެ. “މިސައިލްތައް އޭތި އަމިއްލައަށް ވާހަކަ ދައްކާނެ” ޒެލެންސްކީ ވިދާޅުވިއެވެ.

ހުޅަނގުން ޔުކްރެއިންއަށް ދީފައިވާ ޒަމާނީ ހަތިޔާރުތަކުގެ ތެރޭގައި އެމެރިކާގައި އުފައްދާ "އަޓަކަމްސް" މިސައިލާއި އިނގިރޭސިވިލާތުގައި އުފައްދާ "ސްޓޯމްޝެޑޯ" މިސައިލް ހިމެނެއެވެ. މިއީ ރަޝިޔާގެ އެތެރޭގެ ސަރަހައްދުތަކަށް ހަމަލާދިނުމުގެ ޤާބިލްކަން ލިބިފައިވާ މިސައިލްތަކެކެވެ.

ކުރިން މިތަކެތި ބޭނުންކޮށްގެން ރަޝިޔާގެ އެތެރެއަށް ހަމަލާދިނުމުގެ ހުއްދަ އެމެރިކާއިން އަދި އިނގިރޭސިވިލާތުން ވެސް ދީފައެއް ނުވެއެވެ. ނަމަވެސް މި ދެ ޤައުމުވެސް މިހާރު ވަނީ ޔުކްރެއިންއަށް މި ހުއްދަ ދީފައިކަން ވަނީ ހާމަވެފައެވެ.

މި ހުއްދަ ދިނުމާއި ގުޅިގެން ރަޝިޔާއާއި އެމެރިކާގެ ކުރިމަތިލުމެއް ހިނގައިދާނެކަމުގެ ބިރު އުފެދިފައިވާކަން ފާހަގަކުރެވެއެވެ. ރަޝިޔާގެ މަސްއޫލުވެރިން ދެކޭގޮތުގައި ނޭޓޯގެ ކުރިމަތީގައި ފަހަތަށް ޖެހުމަކީ އަމިއްލައަށް މަރުވުމާ އެއްފަދަ ކަމެކެވެ.

ހުޅަނގުގެ ހަތިޔާރު ބޭނުންކޮށްގެން ރަޝިޔާގެ އެތެރޭގެ އެންމެ ފުނަށް ހަމަލާދިނުމަށް ޔުކްރެއިންއަށް ހިތްވަރު ދެއްވައި ފަރަންސޭސި ރައީސް އިންމަނުއެލް މެކްރޯން އާއި ޔޫރަޕްގެ އިއްތިހާދުގެ ރައީސާ އުރުސުލާ ވޮންޑަލެޔެން ވެސް ވަނީ ވާހަކަ ދައްކަވާފައެވެ.