މިހާރު ރާއްޖޭގައި ބޭރުގެ އެއްވެސް އަސްކަރިއްޔާއެއް ގާއިމުވެފައި ނެތްކަން ކަށަވަރު ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވެއްޖެއެވެ.
ރައީސް ޑރ. މުޙައްމަދު މުޢިއްޒުގެ ސަރުކާރަށް އަހަރެއް ފުރުމާއި ގުޅިގެން، ދައުލަތުގެ މީޑިއާއަށް ދެއްވި ޚާއްޞަ ބަސްދީގަތުމުގައި ދިފާޢީ ވަޒީރު ޣައްސާން ވިދާޅުވީ ބޭރުގެ އަސްކަރިއްޔާ ރާއްޖެއިން ބޭރުކޮށްލުމަކީ ރައީސް ޑރ. މުޢިއްޒު ކޮށްދެއްވި އެންމެ މުހިންމު މަސައްކަތެވެ.
"މިއީ ރައީސް ކޮށްދެއްވި އެންމެ މުހިންމު، އެންމެ ފުރަތަމަ މަސައްކަތަކީ" މިނިސްޓަރު ޣައްސާން ވިދާޅުވިއެވެ. އިތުރަށް ވާހަކަފުޅު ދައްކަވަމުން، މިނިސްޓަރު ފާހަގަކުރެއްވި ގޮތުގައި ބޭރުގެ ސިފައިން އެމީހުންގެ ޤައުމަށް އަނބުރާ ފޮނުވައިލެވުނީ ރައީސް މުޢިއްޒުގެ ހަރުދަނާ ޚާރިޖީ ސިޔާސަތުގެ ދަށުން، ޑިޕްލޮމެސީގެ ރިވެތި އުޞޫލުތައް ބޭނުންކުރައްވައިގެންނެވެ.
މިނިސްޓަރު ޣައްސާން އިތުރަށް ވިދާޅުވި ގޮތުގައި، ޤައުމެއްގެ މިނިވަންކަމާއި އިސްތިޤްލާލު ހިމާޔަތްކުރުމަކީ އެއްފަހަރާ ކުރެވޭ ކަމެއް ނޫނެވެ. އެކަމަށްޓަކައި ކޮންމެ ދުވަހަކުވެސް ކެނޑިނޭޅި މަސައްކަތްތަކެއް ކުރަންޖެހެއެވެ.
ފާހަގަކޮށްލެވޭ ކަމަކީ، ރާއްޖޭގައި ތިބި އިންޑިއާ ސިފައިން ފޮނުވައިލުމަކީ ރައީސް މުއިއްޒުގެ އެންމެ މުހިންމު އެއް ރިޔާސީ ވައުދުފުޅެވެ. މި ވައުދުފުޅު ފުއްދަވައި، ރާއްޖޭގެ މިނިވަންކަން ޙިމާޔަތް ކުރުމަށް އެޅުއްވި މުހިންމު ފިޔަވަޅެއްގެ ގޮތުގައި ޑިފެންސް މިނިސްޓަރު މިކަން ފާހަގަކުރައްވާފައިވެއެވެ.
