ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެއާ އެމްބިއުލާންސް ޚިދުމަތް ފެށި ފަހުން 540 ބަލިމީހުން އުފުލައިފިއެވެ.

ރައީސް މުޢިއްޒުގެ ސަރުކާރަށް އެއް އަހަރު ފުރުމާ ގުޅިގެން، ހެލްތު މިނިސްޓްރީން ހާމަކުރި މަޢުލޫމާތުގައިވާ ގޮތުން، އެއާ އެމްބިއުލާންސްގެ ޚިދުމަތް ފެށި ފަހުން މިހާތަނަށް 540 ބަލިމީހުން ވަނީ އުފުލާފައެވެ.

ހެލްތު މިނިސްޓްރީން ބުނީ މި ޚިދުމަތް ފެށުނީ މިއަހަރުގެ މާރިޗު މަހުގެ 1 ވަނަ ދުވަހު ކަމަށާއި އެދުވަހުން ފެށިގެން މިހާތަނަށް 437 ދަތުރު ކޮށްފައިވާކަމަށެވެ.

އެއާ އެމްބިއުލާންސްގެ ގޮތުގައި ބޭނުންކުރަނީ މޯލްޑިވިއަންގެ އެއަރކްރާފްޓެކެވެ. މި ޚިދުމަތް ފެށުމަކީ ރައީސް މުޢިއްޒުގެ އިންތިޚާބީ ވަޢުދުތަކުގެ ތެރެއިން ވަޢުދެކެވެ.

ރާއްޖޭގެ ޞިއްޙީ ދާއިރާ ހަރުދަނާކޮށް، ރައްޔިތުންނަށް ލުއިފަސޭހަ ޚިދުމަތްތަކެއް ފޯރުކޮށްދިނުމަކީ ރައީސް މުޢިއްޒުގެ ސަރުކާރުގެ އެންމެ މުހިންމު އެއް ސިޔާސަތު ކަމަށްވާއިރު، ކުއްލި ޞިއްޙީ ހާލަތްތަކުގައި ބަލިމީހުން އުފުލުމަށް ޚާއްޞަކުރެވިފައިވާ މި އެއާ އެމްބިއުލާންސްގެ ޚިދުމަތަކީ ރާއްޖޭގެ ޞިއްޙީ ދާއިރާއަށް ގެނެވުނު އެންމެ މުހިންމު އެއް ކުރިއެރުން ކަމުގައި ފާހަގަކުރެވެއެވެ.

މި ޚިދުމަތުގެ ސަބަބުން، ރަށްރަށުގައި ތިބޭ ބަލިމީހުންނަށް ބޭނުންވާ އަވަސް ފަރުވާ ދިނުމަށް މާލެ ގެނައުމުގެ ފުރުޞަތު ފަހިވެ، ގިނަ ފުރާނަތަކެއް ސަލާމަތްކުރެވިފައިވާކަން ފާހަގަކުރެވެއެވެ.