ރައްޔިތުންގެ މަޖިލީހަށް ހުށަހަޅާފައިވާ މީޑިއާ ކައުންސިލާއި ބްރޯޑްކާސްޓިންގ ކޮމިޝަން އެއްކޮށްލުމުގެ ބިލަށް ތާއީދު ނުކުރައްވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މި ސަރުކާރަށް އެއް އަހަރު ފުރުން ފާހަގަކުރުމަށް ސޯޝަލް ސެންޓަރުގައި މިރޭ ބޭއްވި ޚާއްސަ ޖަލްސާއަށްފަހު، ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
ރައީސް ވިދާޅުވީ، މީޑިއާ ކޮންޓްރޯލްކުރާ ބިލަށް ތާއީދު ނުކުރައްވާ ކަމަށާއި، ޕީއެންސީގެ މެޖޯރިޓީ އޮތް މަޖިލީހުން މި ބިލު ބޭރުކުރާނެ ކަމަށެވެ. އަދި އެމަނިކުފާނު ވެސް އެ ބިލު ބަލައިނުގަންނާނެ ކަމަށް ވިދާޅުވިއެވެ. މީގެއިތުރުން، ނޫސްވެރިކަމަށް ހުރަސްއެޅޭ އެއްވެސް ކަމެއް ނުކުރައްވާނެ ކަމަށްވެސް ރައީސް ވަނީ ވިދާޅުވެފައެވެ.
Advertisement
ރައީސް މިފަދައިން ވިދާޅުވެފައި މިވަނީ މި ބިލުން މިނިވަން ނޫސްވެރިކަމަށް ހުރަސްއެޅޭ ކަމަށް ބުނެ ޖާނަލިސްޓް އެސޯސިއޭޝަނުން ބޮޑެތި ކަންބޮޑުވުންތަކެއް ފާޅުކޮށްފައިވަނިކޮށެވެ.
މި މައްސަލައާ ގުޅިގެން ރައީސްއާ މަޝްވަރާކުރުމަށް އެ ޖަމްޢިއްޔާއިން ވަނީ އެޕޮއިންޓްމަންޓަކަށް ވެސް އެދިފައެވެ.
ރައީސް މި ބިލާ ދެކޮޅަށް ވާހަކަފުޅުދައްކަވާފައިވާތީ، ޖާނަލިސްޓް އެސޯސިއޭޝަނުން ވަނީ އެމަނިކުފާނަށް ޝުކުރު އަދާކޮށްފައެވެ. މިނިވަން ނޫސްވެރިކަން ހިމާޔަތްކުރުމަށް ރައީސް މުޢިއްޒު ދެއްވާ އަހައްމިއްޔަތުކަން މިކަމުން ދޭހަވެގެން ދިޔައިރު، އެ ޖަމްޢިއްޔާއިން ބުނެފައިވަނީ ދިވެހިނޫސްވެރިންގެ ގޮވާލުންތައް އަޑުއައްސަވާ ރައީސް މި ނިންމެވި ނިންމެވުމާއި ދެއްވި ޔަޤީންކަން ފާހަގަކޮށް ދިވެހި ނޫސްވެރިންގެ ނަމުގައި އެމަނިކުފާނަށް ޝުކުރު ދަންނަވާ ކަަމަށެވެ.
