ކުރީގެ ރައީސް އިބްރާހިމް މުޙައްމަދު ޞާލިޙްގެ ސަރުކާރުގައި ހިންގި ގެދޮރުވެރިޔާ ސްކީމްގައި ބޮޑެތި އޮޅުވާލުންތަކެއް ހުރިކަމަށާއި ފޯމު ހުށަނާޅާ ހަމައެކަނި އައިޑިކާޑު ދިއްކޮށްލުމުން ވެސް ފްލެޓު ދޫކޮށްފައި އެބަހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ސަރުކާރަށް އަހަރެއް ފުރުމާ ގުޅޭ ގޮތުން މިރޭ ބޭއްވި ޚާއްސަ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ 4,000 ފްލެޓު ލިބޭކަމަށް ލިސްޓު ކުރި މީހުންގެ ތެރޭގައި ފޯމު ހުށަނާޅައި، ހަމައެކަނި އައިޑީކާޑު ދެއްކި ފަރާތްތަކަށް ވެސް ފްލެޓު ދޫކޮށްފައި ހުރިކަމަށެވެ. އަދި މި މައްސަލައިގައި އޭސީސީ އިން ވެސް ތަހުޤީޤު ކުރަންޖެހޭ ގިނަ ކަންތައްތަކެއް ހުރިކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ ކުރީ ސަރުކާރުން އެކުލަވާލި ގެދޮރުވެރިޔާ ކޮމިޓީގައި ހިމެނޭ ސިޔާސީ ފަރާތްތަކަށް ފްލެޓު ލިބޭ ގޮތަށް މާކްސް ބަދަލުކޮށްފައި ހުރި ކަމަށެވެ. މީގެ އިތުރުން، ސިޔާސީ ފަރާތްތަކުގެ ޢާއިލާ މީހުންނަށް އުސޫލާ ޚިލާފަށް ފްލެޓު ދީފައިވާ ކަމަށާއި، އެއް ޢާއިލާއެއްގެ އެތައް މެންބަރުންނަށް ފްލެޓު ދީފައިވާ ކަމަށް ވެސް ރައީސް ވިދާޅުވިއެވެ.

ރައީސް ވިދާޅުވީ ޕޯޓަލްއަށް ހުށަހެޅި ފޯމުތަކުގެ އިތުރަށް ވެސް ފްލެޓު ދީފައި އެބަހުރި ކަމަށާއި އައިޑީކާޑުގެ އެއްފަޅި ހުށަހަޅާފައި ތިބި މީހުންނަށް ވެސް ފްލެޓު ދިންކަމަށެވެ. މީގެ އިތުރުން ވެސް ޕޯޓަލްގެ ބެކްއެންޑުން މާކްޝީޓު ބަދަލުކޮށްފައި އެބަހުރި ކަމަށް ރައީސް ވިދާޅުވިއެވެ.

ރައީސް ވިދާޅުވީ މި ސަރުކާރުން ނެރޭނީ ދެފުށް ފެންނަ ލިސްޓެއް ކަމަށާއި، ކޮންމެ މީހެއްގެ ނަމާއި އިންވެގެން ތަފްޞީލުތައް ލިޔެފައި ހުންނާނެ ކަމަށެވެ. އަދި ކޮންމެ މީހަކު ހޮވުނު ގޮތާއި ނުހޮވުނު ގޮތް ވެސް ހާމަކުރާނެ ކަމަށް ރައީސް ވިދާޅުވިއެވެ.