ބެންކޮކްގައި ކުރިއަށްގެންދިޔަ ޑްރަގް އޮޕަރޭޝަނެއްގައި 3 ކިލޯގެ މަސްތުވާތަކެއްޗާއެކު ދިވެއްސަކު ހައްޔަރުކޮށްފިއެވެ.
މިމީހާ ހައްޔަރުކޮށްފައިވަނީ ބެންކޮކަށް ފޮނުވާފައިވާ ޕެކޭޖެއް ބަލާ ކޮރިއަރ ފެސިލިޓީއަކަށްގޮސް ހުއްޓައެވެ. އެގޮތުން އޭނާ އަތުލައިގަތީ ޕްރޮޓީން ސަޕްލައި ދަޅެއްގައި ފޮރުވާފައި ހުރި 3 ކިލޯގެ މެފެޑްރޯން އާއެކުއެވެ.
ބެންކޮކްގެ އޮފީސް އޮފް ނާކޮޓިކްސް ކޮންޓްރޯލް ބޯޑް (އޯއެންސީބީ) އިން ނޫސްތަކަށް މަޢުލޫމާތު ދީފައިވާ ގޮތުގައި މިމީހާ ހައްޔަރު ކޮށްފައިވާ ގޮތަށް މިދިޔަ ޖޫން މަހުވެސް ކޮރިއަރ ބޭނުންކޮށްގެން ބެންކޮކަށް މަސްތުވާތަކެތި އެތެރެ ކުރަން އުޅުނު ރަޝިއާގެ ރައްޔިތަކު ވަނީ ހައްޔަރުކޮށްފައެވެ.
Advertisement
މީގެ އިތުރުން ހައްޔަރުކުރި ދިވެހި މީހާގެ އެއްވެސް މައުލޫމާތެއް މިވަގުތު ހާމަކުރެވެން ނެތް ކަމަށް އޯއެންސީބީން ބުނެފައިވެއެވެ. އޯއެންސީބީން ބުނި ގޮތުގައި އެމީހާގެ މައުލޫމާތު ހިއްސާނުކުރަނީ މި މައްސަލައާއި ގުޅުން ހުރި އިތުރު މީހުން ހޯދުމުގެ މަސައްކަތް ކުރިއަށް ދާތީއެވެ.
މި ތަހުޤީގުގެ ތެރެއިން ކޮކެއިން، ކެޓަމައިން، އެކްޓެސީ އަދި އެހެނިހެން ޝައްކުރުރެވޭ މާއްދާތައް ފެނިފައިވާ ކަމަށް ތައިލެންޑުގެ ސިފައިން ބުންޏެވެ. އަދި މިއީ ބެންކޮކުގައި އައު ބާވަތެއްގެ ޑްރަގް ފެތުރިދާނެކަމުގެ ބިރު އިތުރުވާ ކަމެއްގޮތުގައި އޯއެންސީބީން ފާހަގަކުރެއެވެ. އެގޮތުން މެފެޑްރޯން އަކީ އައު، އަދި އެހާ ފަސޭހައިން ނުލިބޭ ބާވަތެއްގެ މަސްތުވާތަކެއްޗެއް ކަމުގައި ވީނަމަވެސް، މިއީ ވަރަށް ނުރައްކާތެރި މަސްތުވާތަކެތީގެ ބާވަތެއް ކަމަށް އޯއެންސީބީން ބުންޏެވެ.
