ވޭސްޓް މެނޭޖުމަންޓް ކޯޕަރޭޝަން (ވެމްކޯ) ގެ ރިސޯޓުތަކުން ކުނި ނަގައިދިނުމުގެ "ފަތުރުވެށި" ޚިދުމަތާއި އިތުރު 3 ރިސޯޓެއް ގުޅިއްޖެއެވެ. މި ޚިދުމަތް ލިބިގަތުމަށް އަލަށް ގުޅުނު ރިސޯޓުތަކާއިއެކު ވެމްކޯއިން ވަނީ އެއްބަސްވުމުގައި ސޮއިކޮށްފައެވެ.
ވެމްކޯގެ މެނޭޖިންގ ޑިރެކްޓަރ މުޖްތަބާ ޖަލީލު ވިދާޅުވީ، މީގެ ކުރިން ރިސޯޓުތަކުގެ ކުނި ތިލަފުށްޓަށް ގެންނަނީ އަމިއްލަ ފަރާތްތަކުން ކަމަށާއި، މިގޮތަށް ކުނި ގެންނައިރު ބައެއް ކުނި ކަނޑަށް އެޅިފައި ހުންނަކަން ފާހަގަކުރެވޭ ކަމަށެވެ. އެހެންކަމުން އެންމެ ރަނގަޅު ގޮތަކީ ވެމްކޯގެ ކުނި ގެންދިޔުމުގެ ޚިދުމަތާއި ގުޅުން ކަމަށް އޭނާ ވިދާޅުވިއެވެ.
"މި ޚިދުމަތުން އަޅުގަނޑުމެން ޚަރަދުކުރަންޖެހެނީ ލޮޖިސްޓިކަށް އެކަނި. މި ޚިދުމަތުގެ ސަބަބުން ކުންފުންޏަށް ބޮޑު އާމްދަނީއެއް ލިބޭނެ. އަޅުގަނޑުމެންގެ އަމާޒަކީ ރާއްޖޭގެ ހުރިހާ ރިސޯޓެއްވެސް ވެމްކޯގެ ކުނި ނަގައިދިނުމުގެ ޚިދުމަތަށް ގެނައުން." މުޖްތަބާ ވިދާޅުވިއެވެ.
Advertisement
ވެމްކޯއިން ރިސޯޓުތަކުން ކުނި ނަގައިދިނުމުގެ ޚިދުމަތް ފަށާފައިވަނީ މިއަހަރުގެ ޖުލައި 11 ގައެވެ. މި ޚިދުމަތް ލިބިގަންނަން ފެށި އެންމެ ފުރަތަމަ ރިސޯޓުތަކަކީ ކޮރާކޮރާ މޯލްޑިވްސް، އަލިލާކޮޓެއިފަރު އަދި ނޮކު މޯލްޑިވްސްއެވެ. އަލަށް ގުޅުނު 3 ރިސޯޓަކީ މަލާހިނި ކުޑަބަނޑޮސް މޯލްޑިވްސް، ޖުމައިރާ އޮޅަހަލި މޯލްޑިވްސް އަދި މޫވެންޕިކް ކުރެދިވަރު މޯލްޑިވްސްއެވެ.
ވެމްކޯއިން ބުނީ އިތުރު ދެރިސޯޓަކާއެކު މި ޚިދުމަތާއި ގުޅުމުގެ އެއްބަސްވުމުގައި ސޮއިކުރެވޭނެ ކަމަށާއި، އޭރުން ޖުމްލަ 8 ރިސޯޓަށް ޚިދުމަތް ދެވެން ފެށޭނެ ކަމަށެވެ. މި ޚިދުމަތަށް ރަޖިސްޓްރީކުރާ ހުރިހާ ރިސޯޓުތަކަށްވެސް ވެމްކޯގެ އުޅަނދުތަކުގައި ކުނި ނަގައިދޭނެ ކަމަށް ވެމްކޯއިން ބުންޏެވެ.
