ފެމިލީ އެންޑް ޗިލްޑްރެން ސަރވިސް ސެންޓަރުތަކުގެ ކޭސްވަރކަރުންނަށް އަމާޒުކޮށްގެންސޯޝަލް ވަރކަރސް ސްކިލްސް އެންހޭންސްމަންޓް ޕްރޮގްރާމް ފަށައިފިއެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އިސްނަގައިގެން ކުރިއަށްގެންދާ މި ޕްރޮގްރާމަކީ 04 ދުވަހުގެ ތަމްރީން ޕްރޮގްރާމެކެވެ. މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 2 ބެޗަކަށް ބަހާލައިގެން ކަމަށް ވުޒާރާއިން ބުންޏެވެ.
މި ޕްރޮގްރާމްގެ މައިގަނޑު މަޤްސަދަކީ، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ދަށުން ހިނގަމުންދާ ފެމިލީ އެންޑް ޗިލްޑްރެން ސަރވިސް ސެންޓަރު ތަކުގައި މަސައްކަތް ކުރާ ކޭސްވަރކަރުންނަށް ބޭނުންވާ ފަންނީ ޢިލްމާއި ތަމްރީނާއި ހުނަރު ފޯރުކޮށްދިނުން ކަމަށް ވުޒާރާއިން ބުންޏެވެ. އަދި ޚިދުމަތް ފޯރުކޮށްދިނުމުގައި، އެއް މިންގަނޑަކުން ޢަމަލު ކުރެވޭކަން ކަށަވަރުކުރުމާއި، ދެވޭ ޚިދުމަތުގެ ފެންވަރު ރަނގަޅުކުރުން ކަމަށް ވުޒާރާއިން ބުންޏެވެ.
ވުޒާރާއިން ބުނީ މި ތަމްރީނު ޕްރޮގްރާމްގެ ތެރެއިން ހުށަހެޅޭ މައްސަލަތަކުގައި ކުރެވޭ ވޭދަނައިގެ މަސައްކަތުގައި، މިވަގުތު ކޭސް ވޯކަރުންނަށް ކުރިމަތިވެފައިވާ ފަންނީ ގޮންޖެހުންތައް ދެނެގަނެ، ތަމްރީނު ފޯރުކޮށްދެވިގެންދާ ކަމަށެވެ.
މީގެ އިތުރުން ވުޒާރައިގެ މައިގަނޑު އެއް އަމާޒަކީ، ވަށައިޖެހޭފަދަ ޚިދުމަތްތަކެއް އާއިލީ ނަޒަރަކުން، ހުށައެޅޭ މައްސަލަތަކުގައި ކޮންމެ އާއިލާއަކަށް ކޭސްވޯކަރަކު ހަމަޖެހި، ލުއިފަސޭހަ ގޮތެއްގައި، އިތުބާރު ކުރެވޭފަދަ ޚިދުމަތެއް ފޯރުކޮށްދިނުން ކަމަށް ވުޒާރާއިން ބުންޏެވެ. އަދި، މި ތަމްރީނު ޕްރޮގްރާމްގެ ޒަރީއާއިން މި އަމާޒަށް ވާސިލުމުވަށް މުޅިރާއްޖޭގައި މިވަގުތު މަސައްކަތްކުރަމުންދާ ހުރިހާ ކޭސް ވޯކަރުން ތަމްރީނު ކުރެވިގެންދާނެ ކަމަށްވެސް ވުޒާރާއިން ބުންޏެވެ.
މި ޕްރޮގްރާމުގެ ޒަރީއާއިން ފެމިލީ އެންޑް ޗިލްޑްރެން ސަރވިސް ސެންޓަރުތަކުގައި މަސައްކަތް ކުރާ ކޭސްވަރކަރުން މިހާރު ކުރަމުންގެންދާ މަސައްކަތްތައް އިތުރަށް ހަރުދަނާވެ، މިހާރު ދެވޭ ޚިދުމަތުގެ ފެންވަރު ރަނގަޅުވެ، ހަރުދަނާ ގޮތެއްގައި ޚިދުމަތްތައް ފޯރުކޮށްދެވިގެންދާނެ ކަމަށް ވުޒާރާއިން ބުންޏެވެ.
މި ޕްރޮގްރާމްގެ ފުރަތަމަ ބުރުގައި ޖުމްލަ 25 މުވައްޒަފުން ބައިވެރިވާ މި ތަމްރީނުގައި ހދ، ށ ،ބ ، ޅ ، ދ ، ގދ ،ޏ ، ނ، ހއ، ރ ، ސ ، މ ، ފ، ލ އަދި ގއ ފެމިލީ އެންޑް ޗިލްޑްރެން ސަރވިސް ސެންޓަރުގެ މުވައްޒަފުން ބައިވެރިވާކަމަށް ވުޒާރާއިން ބުންޏެވެ.
