ދެކުނު އޭޝިއާ ސަރަޙައްދުގައި ކްލައިމެޓް ސްމާޓް އެގްރިކަލްޗަރ ކުރިއެރުވުމަށް ސާކް އެގްރިކަލްޗަރ ސެންޓަރުން ކުރިއަށްގެންދާ "ކޮންސޯޓިއަމް ފޮރ ސްކޭލިންގ އަޕް ކްލައިމެޓް ސްމާޓް އެގްރިކަލްޗަރ އިން ސައުތު އޭޝިއާ" ޕްރޮޖެކްޓްގެ ސްޓިއަރިންގ ކޮމިޓީ ބައްދަލުވުން މިއަދު ދިވެހިރާއްޖޭގައި ފަށައިފިއެވެ.
ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން މައުލޫމާތު ދިންގޮތުގައި، ވިލާ ނޯޓިކާ ޕެރަޑައިސް އައިލެންޑް ރިސޯޓުގައި ކުރިއަށްދާ މި ބައްދަލުވުމުގައި ސާކުގެ 7 ޤައުމުގެ މަންދޫބުންނާއި، އިންޓަނޭޝަނަލް ފަންޑް ފޮރ އެގްރިކަލްޗަރ ޑިވެލޮޕްމަންޓުގެ އިސްވެރިޔާއާއި، އިންޓަނޭޝަނަލް ފުޑް ޕޮލިސީ ރިސާޗް އިންސްޓިޓިއުޓްގެ ޑިރެކްޓަރާއި، ސާކް ޑިވެލޮޕްމަންޓް ފަންޑުގެ އިސްވެރިންގެ އިތުރުން ސާކް އެގްރިކަލްޗަރ ސެންޓަރުގެ އިސްވެރިން ބައިވެރިވެއެވެ.
https://x.com/MAAWmv/status/1856567016255303703?t=p-sYdKVyW6D8x2EtWnKJiw&s=19
Advertisement
ވުޒާއިން ބުނީ، މި ބައްދަލުވުމުގެ މަޤްޞަދަކީ ޕްރޮޖެކްޓްގެ މަސައްކަތްތައް މިހާރު ގޮސްފައިވާ މިންވަރު ދެނެގަތުމާއި، އެކި ޤައުމުތަކުގައި މި މަޝްރޫޢުގެ ދަށުން ކުރަމުންގެންދާ މަސައްކަތްތަކުގެ މަޢުލޫމާތު ޙިއްޞާކުރުންކަމަށެވެ. އަދި މަޝްރޫޢުގެ މަޤްޞަދުތައް ޙާޞިލްކުރުމަށް ކުރަންހުރި މަސައްކަތްތަކާއި ގުޅޭގޮތުން މެންބަރުންގެ މެދުގައި މަޝްވަރާކުރުން ކަމަށް ވެސް ވުޒާއިން ބުންޏެވެ.
މި މަޝްރޫޢުގެ ފޯކަލްޕޮއިންޓަކަށް ދިވެހިރާއްޖެއިން ކަނޑައަޅާފައިވާ މިނިސްޓްރީގެ ޑިރެކްޓަރ އަލީ އާމިރު، ބައްދަލުވުން ފެށުމުގެ ރަސްމިއްޔާތުގައި ވާހަކަދައްކަވަމުން، މިފަދަ ސަރަޙައްދީ މަޝްރޫޢުތަކުގެ މުހިންމުކަމުގެ މައްޗަށް އަލިއަޅުވާލެއްވިއެވެ.
2021 ވަނަ އަހަރުން ފެށިގެން މި ސަރަޙައްދުގެ 6 ޤައުމެއްގައި ކުރިއަށްގެންދާ މި މަޝްރޫޢުގެ ޢަމަލީ މަސައްކަތްތައް ހިނގަމުންދަނީ ބަންގްލަދޭޝް، ބޫޓާން، އިންޑިއާ، ނޭޕާލް، ޕާކިސްތާން އަދި ސްރީލަންކާގައެވެ. ދިވެހިރާއްޖެއަކީ މި ސަރަޙައްދުގެ އެހެން ޤައުމުތަކެކޭ އެއްފަދައިން ހަނޑުލާއި ގޮވާމުގެ ބާވަތްތައް ހައްދާ ޤައުމަކަށް ނުވިނަމަވެސް، ރާއްޖޭގެ ދަނޑުވެރިކަމަށް އެކަށީގެންވާ ކަންކަމުގައި، ޚާއްޞަކޮށް ކްލައިމެޓް ސްމާޓް އެގްރިކަލްޗަރ އާއި މަޢުލޫމާތު ޙިއްޞާކުރުމުގެ ޕްރޮގްރާމްތަކުގައި ބައިވެރިވުމުގެ ފުރުޞަތު މި މަޝްރޫޢުގެ ދަށުން ދިވެހިރާއްޖެއަށް ލިބެމުންދާކަން ވުޒާރާއިން ފާހަގަކުރެއެވެ.
