ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ގެންދާ 15 މައިގަނޑު މަޝްރޫޢެއް ފެށުމަށްޓަކައި "ޓްރާންސްފޯމިން ޓުމޯރޯ" ރަސްމީކޮށް އިފްތިތާޙުކޮށްފިއެވެ. ރޭ ހުޅުމާލޭ ސެންޓްރަލް ޕާކުގައި ބޭއްވުނު ޚާއްޞަ ރަސްމިއްޔާތުގައި މި މަޝްރޫޢުތައް އިފްތިތާޙުކޮށްދެއްވީ އިކޮނޮމިކް މިނިސްޓަރ މުޙައްމަދު ސަޢީދެވެ.

މި މަޝްރޫޢުތަކުގެ ތެރޭގައި ހުޅުމާލޭގައި ހިންގާ އިތުރު ބޯހިޔާވަހިކަމުގެ މަޝްރޫޢުތަކާއި، ރާއްޖެއަށް މުޅިން އަލަށް ތަޢާރަފުކުރާ މަޝްރޫޢުތައް ހިމެނެއެވެ. އޭގެ ތެރޭގައި ރަސްމާލެ ޕްރޮޖެކްޓާއި، ހުޅުމާލޭގައި ހިންގާ އިތުރު ދެ ސޯޝަލް ހައުސިންގ މަޝްރޫޢު، ރޯ ހައުސް މަޝްރޫޢު، އަދި ބިންވެރިޔާ ސްކީމުން ގޯތި ލިބިފައިވާ ފަރާތްތަކަށް ޚާއްޞަކޮށްގެން ކުރިއަށްގެންދާ ޕްރީފެބް ގެތަކުގެ މަޝްރޫޢު ހިމެނެއެވެ.

އެޗްޑީސީން ހުޅުމާލޭގައި ހިންގުމަށް ރާވާފައިވާ ސޯޝަލް ހައުސިންގ މަޝްރޫޢުތަކުގެ ދަށުން 2،100 ފްލެޓް އެޅުމަށް ވަނީ ހަމަޖެހިފައެވެ. މީގެ ތެރޭގައި ދެ ކޮޓަރި އަދި ތިން ކޮޓަރީގެ ފްލެޓްތައް ހިމެނެއެވެ. މީގެ އިތުރުން، ރާއްޖޭގެ ވިޔަފާރިތަކަށް ފުރުޞަތު ލިބޭ ގޮތަށް ކޮމާޝަލް ޔުނިޓުތައް ވެސް އެޅުމަށް ވަނީ ރޭވިފައެވެ.

މި މަޝްރޫޢުތަކުގެ ތެރޭގައި ހިމެނޭ އެހެނިހެން ޕްރޮޖެކްޓްތަކުގެ ތެރޭގައި ލަގްޒަރީ ވިލާތަކަށް ޚާއްޞަކޮށްފައިވާ ފަރުކޮޅުފުށި ގޭޓެޑް ކޮމިއުނިޓީ ޕްރޮޖެކްޓް، އެސްއޯއީތަކަށް ޚާއްޞަ އޮފީސް އިމާރާތް، އުމުރުން ދުވަސްވީ މީހުންނަށް ޚާއްޞަކޮށްފައިވާ އެލްޑަލީ ކެއަރ ފެސިލިޓީ، އަދި އައިލް އެޑްވެންޗަރ ޕާކް ހިމެނެއެވެ.

މި މަޝްރޫޢުތަކަކީ ރައީސް ޑރ. މުޙައްމަދު މުޢިއްޒުގެ މެނިފެސްޓޯއާ އެއްގޮތަށް، ހުޅުމާލެ ހިމެނޭހެން އެޗްޑީސީގެ ބެލުމުގެ ދަށުގައި އޮތް ރަށްތައް ތަރައްޤީ ކުރުމަށް އިފްތިތާޙުކުރެވުނު މަޝްރޫޢުތަކެކެވެ. މި މަޝްރޫޢުތަކުގެ ސަބަބުން މާލޭ ސަރަޙައްދުގެ ބޯހިޔާވަހިކަމުގެ މައްސަލައަށް ޙައްލެއް ލިބޭނެ ކަމަށް އުންމީދު ކުރެވެއެވެ.

އެޗްޑީސީގެ މެނޭޖިންގ ޑިރެކްޓަރު ފަޟުލް ރަޝީދު އަދި ސިޓީ ޑިވެލޮޕްމަންޓްސް ޕްރައިވެޓް ލިމިޓެޑްގެ ޑިރެކްޓަރު ޑޭވިޑް ޕިއެރިސް ވަނީ އައިލް އެޑްވެންޗަރ ޕާކުގެ ޑިޒައިން ކޮންސަލްޓަންސީ އަދި ތަނުގެ އޮޕަރޭޝަނަށް މުހިންމު ތަމްރީނުތައް ދިނުމާއި ގުޅޭ އެމްއޯޔޫއެއްގައި ސޮއިކޮށްފައެވެ.

މި މަޝްރޫޢުތަކުގެ ތެރޭގައި ހިމެނޭ އެހެނިހެން މުހިންމު ޕްރޮޖެކްޓްތަކުގެ ތެރޭގައި:

1. ހުޅުމާލޭގައި 15 ޕާކިންގ އިމާރާތް

2. ރޭސިންގ ޓްރެކް، ޑްރިފްޓް ޓްރެކް، އަދި ގޯ-ކާޓް ޓްރެކް

3. ރޮލަރ ސްކޭޓިންގ އަދި ވޯޓަރ ތީމް ޕާކް ހިމެނޭ އައިލް އެޑްވެންޗަރ ޕާކް

4. ހިސްޓްރީ ސެންޓަރ އަދި ނޮލެޖް ޕާކް

5. ގުޅީ ފަޅު ތެރޭގައި ހަދާ "ނޫވެލި" ލަގްޒަރީ ގެތައް

މި މަޝްރޫޢުތައް ފެށުމާއެކު، ރާއްޖޭގެ ބޯހިޔާވަހިކަމުގެ މައްސަލައަށް ހައްލެއް ލިބި، ހުޅުމާލެ އިތުރަށް ތަރައްޤީވެ، އާބާދީ އިތުރުވެގެންދާނެއެވެ.