ކޭޕޮޕްގެ މަޝްހޫރު ބޭންޑު، ބީޓީއެސްގެ މެމްބަރު ޖިން އޭނާގެ ފުރަތަމަ ސޯލޯ އަލްބަމް "ހެޕީ" ނެރުމުގެ އުފަލުގައި 50 ސިފައިން ނުވަތަ ފޭނުން ގޮވައިގެން ޑޭޓަކަށް ދާން ނިންމައިފިއެވެ. މިކަން ހާމަކޮށްފައިވަނީ ޖިން ތަމްސީލުކުރާ ކުންފުނި ބިގްހިޓް މިއުޒިކުންނެވެ.
ޖިންގެ އަލްބަމް "ހެޕީ" ނެރުމަށް ހަމަޖެހިފައިވަނީ މި މަހުގެ 15 ވަނަ ދުވަހުއެވެ. އަދި ފޭނުންނަށް ޚާއްޞަ މި ޑޭޓް އިވެންޓު ކުރިއަށްދާނީ މި މަހުގެ 24ވަނަ ދުވަހު ކަމަށް ބިގްހިޓުން މަޢުލޫމާތު ދީފައިވެއެވެ. ޑޭޓަށް ހޮވާފައިވާ ތަނަކީ ކޮރެއާގެ މަޝްހޫރު އަދި ޚާއްޞަ ޕާކެއް ކަމުގައިވާ "ލޮއްޓޭ ވޯލްޑް އެޑްވެންޗަރ" އެވެ.
ބިގްހިޓް މިއުޒިކުން ބުނެފައިވާ ގޮތުގައި މިއީ ޖިންގެ އަމިއްލަ ވިސްނުމެކެވެ. އަދި މިއީ ޖިންގެ އަލްބަމްގެ ނަމާއި އެއްގޮތަށް އާމީސްއާއި ޖިންއާ ދެމެދު އުފާވެރި ވަގުތުކޮޅެއް ހޭދަކުރުމުގެ މަޤްޞަދުގައި ޖިން ރާވާފައިވާ ކަމެއް ކަމަށްވެސް ބުންޏެވެ،
ޖިންއާއެކު ޑޭޓަކަށް ދިއުމުގެ ފުރުޞަތު ހޯދުމަށް ބޭނުންވާ ފަރާތްތަކުން ޖިންގެ އަލްބަމް ގަތުމަށްފަހު ގުރުއަތުލުމުގައި ބައިވެރިވާންޖެހެއެވެ. މި ފުރުޞަތު ހުޅުވާލެވިފައިވަނީ ނޮވެމްބަރު މަހުގެ 11 ވަނަ ދުވަހުން ފެށިގެން ނޮވެމްބަރު 18 ވަނަ ދުވަހުގެ ނިޔަލަށެވެ. ގުރުއަތުލުން އޮންނާނީ ނޮވެމްބަރު 19 ވަނަ ދުވަހު ކަމަށް ބިގްހިޓުން ބުނެއެވެ.
މީގެ އިތުރުން، ޖިންގެ "ހެޕީ" އަލްބަމް ނެރުމަށްފަހު ދެދުވަހުގެ ކޮންސަޓެއް ބޭއްވުމަށް ވެސް ނިންމާފައި ވެއެވެ. މި ކޮންސަޓް އޮންނާނީ ނޮވެމްބަރު 16 އާއި 17 ވަނަ ދުވަހު ސޯލްގެ ޖަންގްޗުން އެރީނާގައެވެ.
