ގާތްގަނޑަކަށް ހަތަރު އަހަރު ދުވަހުގެ މެދުކެނޑުމަކަށްފަހު، ކޭ-ޕޮޕްގެ ދުނިޔެ މަޝްހޫރު ބޭންޑް ބީޓީއެސް އިން އަލުން ފެށި ވޯލްޑް ޓުއާ ބަލާލުމަށްޓަކައި، އެތައް ހާސް ސަޕޯޓަރުންނެއް ބުރާސްފަތި ދުވަހު ދެކުނު ކޮރެއާގެ ސްޓޭޑިއަމަކަށް އެއްވެއްޖެ އެވެ.
ބޭންޑުގެ ހަތް މެންބަރުން ކަމަށްވާ އާރް.އެމް، ޖިން، ސޫގާ، ޖޭ-ހޯޕް، ޖިމިން، ވީ އަދި ޖަންގް ކޫކް މި ކޮންސާޓްގައި ހުށަހަޅައިދީފައިވަނީ އެމީހުންގެ ކުރީގެ މަޝްހޫރު ލަވަތަކާއި، އަލަށް ނެރުނު ފަސްވަނަ އަލްބަމް "އަރީރަންގް" ގެ ލަވަތަކެވެ. މިއީ ބޭންޑުގެ ހުރިހާ މެންބަރުން ދެކުނު ކޮރެއާގެ ގާނޫނީގޮތުން މަޖުބޫރު އަސްކަރީ ޚިދުމަތް ފުރިހަމަކުރުމަށްފަހު ބޭއްވި ފުރަތަމަ ޝޯ އެވެ.
ބޯކޮށް ވާރޭ ވެހެމުންދިޔަ ނަމަވެސް، ރަޝިޔާ، އެމެރިކާ އަދި ބްރެޒިލް ފަދަ ދުނިޔޭގެ އެކި ކަންކޮޅުތަކުން އައި ސަޕޯޓަރުން ހިމެނޭހެން، 40،000 އަށްވުރެ ގިނަ މީހުންގެ ޖާގަ އޮންނަ މި ސްޓޭޑިއަމް އޮތީ މުޅިން ފުރިފަ އެވެ. މިއީ 2021-22 ގެ "ޕާމިޝަން ޓު ޑާންސް އޮން ސްޓޭޖް" ޓުއާ އަށްފަހު ބޭންޑުން ބާއްވާ ފުރަތަމަ ބޮޑު ޓުއާ އެވެ. ޓިކެޓް ނުލިބުމުގެ ސަބަބުން ސްޓޭޑިއަމަށް ނުވަދެވުނު ސަތޭކައަށްވުރެ ގިނަ ސަޕޯޓަރުންވެސް ކުޑަ ހިފައިގެން ސްޓޭޑިއަމް ބޭރުގައި ތިބީ ބޭންޑުގެ ލަވަތައް އަޑުއަހާލުމުގެ ބޭނުމުގަ އެވެ.
Advertisement
ބީޓީއެސްގެ ހަތް މެންބަރުންވެސް މިހާރު ވަނީ އަސްކަރީ ހިދުމަތް ފުރިހަމަކޮށްފަ އެވެ. އެންމެ ފަހުން ހިދުމަތުން ވަކިވީ 2025 ވަނަ އަހަރުގެ ޖޫން މަހު ސޫގާ އެވެ. ކޮނޑަށް ލިބިފައިވާ އަނިޔާއެއްގެ ސަބަބުން އޭނާ ހިދުމަތް ކުރީ ސީދާ އަސްކަރީ ކޭމްޕްތަކުގެ ބަދަލުގައި ސަރުކާރުގެ އެކި އިދާރާތަކުގަ އެވެ. ދެކުނު ކޮރެއާގެ ގާނޫނު ބުނާގޮތުން، އުމުރުން 18 އަހަރާއި 28 އަހަރާ ދެމެދުގެ ސިއްހަތު ސަލާމަތުން ހުރި ކޮންމެ ފިރިހެނަކު 21 މަސް ދުވަހުގެ އަސްކަރީ ހިދުމަތް ފުރިހަމަކުރަން ޖެހެ އެވެ. މިއީ އުތުރު ކޮރެއާގެ ނުރައްކާތަކުން ރައްކާތެރިވުމަށް އެކުލަވާލާފައިވާ ނިޒާމެކެވެ.
ބޭންޑުގެ އާ އަލްބަމް "އަރީރަންގް" އަށް ނަން ދީފައިވަނީ ކޮރެއާގެ ގައުމީ ސަލާމުގެ ގޮތުގައި ބެލެވޭ ވަރަށް ގަދީމީ ފޯކް ލަވައަކަށް ނިސްބަތްކޮށެވެ. މި އަލްބަމް ބިލްބޯޑް 200 ޗާޓުގެ އެއްވަނަ ހޯދާފައިވާއިރު، އޭގެ ސިންގަލް "ސްވިމް" ވެސް ވަނީ ޗާޓުތަކުގެ ކުރި ހޯދާފަ އެވެ. ކޮރެއާ ބަހުން "ބަންގްޓަން ސޮންޔޮންދަން" ނުވަތަ ބީޓީއެސް އުފެދުނީ 2013 ވަނަ އަހަރުގެ ޖޫން މަހުގަ އެވެ.
އާދީއްތަ ދުވަހުގެ ނިޔަލަށް ދެކުނު ކޮރެއާގައި ކުރިއަށްދާ މި ޝޯތަކަކީ އެމެރިކާ، ޔޫރަޕް އަދި އޭޝިއާ ހިމެނޭހެން ކުރިއަށްގެންދާ ބޮޑު ދަތުރެއްގެ ފެށުމެވެ. މި ދަތުރުގައި 2027 ވަނަ އަހަރުގެ ކުރީކޮޅު އޮސްޓްރޭލިއާއަށް ދިއުމަށް ހަމަޖެހިފައިވާއިރު، މި ޓުއާ ނިންމާލުމަށް ހަމަޖެހިފައިވަނީ އަންނަ އަހަރުގެ މާރިޗު މަހު ފިލިޕީންސްގެ މެނީލާގަ އެވެ. މާހިރުން އުންމީދުކުރާ ގޮތުގައި މި ދަތުރުން ކޮންމެ ކުއާޓަރެއްގައި އެތައް މިލިއަން ޑޮލަރެއްގެ އާމްދަނީއެއް ލިބޭނެ އެވެ.
