އަންނަ އަހަރުގެ ނިޔަލަށް ދައުލަތުގެ ރަސްމީ ރިޒާވް 705 މިލިޔަން ޑޮލަރަށް އަރާނެކަމަށް ލަފާކޮށްފައިވާކަން އަންނަ އަހަރަށް ލަފާކުރާ ދައުލަތުގެ ބަޖެޓުގައި ހާމަކޮށްފިއެވެ. މިކަން ހާމަކޮށްފައިވަނީ ބަޖެޓާ ގުޅޭގޮތުން ނެރެފައިވާ ބަޖެޓް ޕޮޒިޝަން ރިޕޯޓުގައެވެ.
މިއަހަރު ނިމޭއިރު ރަސްމީ ރިޒާވުގައި ހުންނާނެ ކަމަށް ލަފާކުރަނީ 653.6 މިލިޔަން ޑޮލަރެވެ. މިއީ މިދިޔަ އަހަރު ނިމުނުއިރު ހުރި 590.5 މިލިޔަން ޑޮލަރަށްވުރެ އިތުރު އަދަދެކެވެ. ނަމަވެސް މިއީ ވޭތުވެދިޔަ ފަސްއަހަރުތެރޭގައި އަހަރު ނިމުނުއިރު ރަސްމީ ރިޒާވް އެންމެ ދަށްވި މިންވަރެވެ.
މިއަހަރަށް ކަނޑައެޅި ސަޕްލިމެންޓްރީ ބަޖެޓާއި ގުޅޭގޮތުން އެމްއެމްއޭއިން ދިން ފަންނީ ލަފާގައި ބުނެފައިވަނީ، ބޭރުގެ ފަރާތްތަކުން މިއަހަރު ހޯދުމަށް ލަފާކުރި މާލީ އެހީ ހޯދުމަށް ސަރުކާރަށް ދަތިތަކާ ކުރިމަތިލާންޖެހުމުގެ ސަބަބުން ރާއްޖޭގެ ރަސްމީ ރިޒާވް 2023 ވަނަ އަހަރާ އަޅާބަލާއިރު މިއަހަރު ހީނަރުވެފައިވާ ކަމަށެވެ.
Advertisement
ރިޒާވް އިތުރުކުރުމަށް އެޅޭ ފިޔަވަޅުތަކުގެ ތެރޭގައި، ބޭންކް އޮފް އިންޑިއާއާއެކު ކަރަންސީ ސްވޮޕް ފެސިލިޓީ އަލުން ގާއިމްކުރެވި، ކުރު މުއްދަތުގައި މި ފެސިލިޓީ ބޭނުންކުރުމުގެ ފުރުސަތު ލިބިފައިވާކަން އެމްއެމްއޭއިން ފާހަގަކޮށްފައިވެއެވެ. އަދި ބޭރުފައިސާގެ ޤަވާއިދަށް ބަދަލުތަކެއް ގެނެސް ރީއެލޮކޭޝަންއަށް އެޝަންއަށް އެމްއެމްއޭއަށް ބޭރުފައިސާ ވަންނަ ގޮތަށް ބަދަލުގެނެސްފައިވެއެވެ.
މިފަދަ ބަދަލުތަކާއެކު ކުރިއަށް އޮތް އަހަރަށް ދައުލަތުގެ ރަސްމީ ރިޒާވަށް ހެޔޮ ބަދަލުތަކެއް އަންނާނެ ކަމަށް ބަޖެޓް ޕޮޒިޝަން ރިޕޯޓުގައި އަންދާޒާކޮށްފައިވެއެވެ. މިގޮތުން އަންނަ އަހަރުގެ ނިޔަލަށް 705.1 މިލިޔަން ޑޮލަރު ރަސްމީ ރިޒާވުގައި ހުންނާނެކަމަށް ލަފާކޮށްފައިވެއެވެ.
