މި ސަރުކާރުން ދިވެހި ފައިސާ ޗާޕު ނުކުރާނެ ކަމަށް، ޖުމްހޫރީ ދުވަހުގެ ޚާއްސަ ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރޭ ކުރިއަށްދިޔަ މި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ މި ސަރުކާރަށް ވާރުތަވީ ދަރަނިވެރި އިޤްތިޞާދެއް ކަމަށެވެ. އެގޮތުން މިދިޔަ ސަރުކާރުން މި ސަރުކާރާ ގަޢުމު ހަވާލު ކުރީ ދުވަހަކުވެސް ރާއްޖެ ދަރަނިކޮށްނުލާ ވަރަށް ދަރަނިކޮށްލާފައި ކަމަށް ރައީސް ވިދާޅުވިއެވެ.
ރައީސް ވިދާޅުވީ، ސަރުކާރާ ހަވާލުވެވަޑައިގެންނެވި އިރު ޤައުމުގެ ދަރަނި ހުރީ 120 ބިލިއަން ރުފިޔާއަށްވުރެ މަތީގައި ކަމަށެވެ. އަދި 8 ބިލިއަނަށް ވުރެ ގިނަ ރުފިޔާ ޗާޕުކޮށްފައި ވުމުގެ ސަބަބުން ދިވެހި ފައިސާގެ އަގު ވެއްޓެން ފަށާފައިވާ ކަމަށް ރައީސް ފާހަގަ ކުރެއްވިއެވެ.
Advertisement
ފާއިތުވެ މިދިޔަ އަހަރު ތެރޭ މި ސަރުކާރުން ޤައުމުގެ މާލިއްޔަތު ހަމަޖައްސަމުން، ދަރަނި ދައްކަމުން، ސޮވަރިންގ ފަންޑަށްވެސް އަލުން ޑޮލަރު ޖަމާކޮށް ރައްކާ ކުރަމުން އަންނަނީ އެއްވެސް ވަރަކަށް ފައިސާ ޗާޕު ނުކޮށްކަން ރައީސް ފާހަގަ ކުރެއްވިއެވެ.
ރައީސް ވިދާޅުވީ މީގެ ކުރިން އެމަނިކުފާނު ފައިސާ ޗާޕު ނުކުރާނެ ކަމަށް ވަޢުދުވެވަޑައިގެންފައިވާނެ ކަމަށެވެ. އަދި ސަރުކާރުގެ 51 ހަފްތާ ނިމިގެން ދިޔައިރު ފައިސާ ޗާޕު ނުކުރާ ކަމަށާއި، ކުރިއައް އޮތް ތަނުގައިވެސް ފައިސާ ޗާޕު ނުކުރައްވާނެ ކަމަށް ރައީސް ވިދާޅުވިއެވެ.
މިދިޔަ ސަރުކާރުގައި، އެމްއެމްއޭ އިން ވަނީ ޚަރަދުތައް ހަމަޖައްސަން ކަމަށް ބުނެ ގިނަ ޢަދަދެއްގެ ފައިސާ ޗާޕުކޮށްފައެވެ. މިކަމުގެ ސަބަބުން އިޤްތިޞާދުގައި ދައުރުވާ ފައިސާގެ ޢަދަދު ގިނަވެ، ރާއްޖޭގެ އެކްސްޗޭންޖް ރޭޓަށް ނޭދެވޭ އަސަރު ކުރާނެ ކަމަށް އޭރު އެމްއެމްއޭއިން ވަނީ ލަފާދީފައެވެ.
