އިހަވަންދިއްޕޮޅުގައި ބަންކަރިންގެ ޚިދުމަތް ހުއްޓިފައިވާ ކަމަށް ބައެއް މީޑިއާތަކުން ފަތުރަމުން އަންނަ ޚަބަރުތައް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ މެނޭޖިން ޑިރެކްޓަރު ޝިމާދު އިބްރާހިމް މިއަދު ދޮގުކުރައްވައިފިއެވެ.
ޝިމާދު މިހެން ވިދާޅުވީ ބަންކަރިންގެ ޚިދުމަތް ދޭން އުތުރުގައި ބާއްވާފައި އޮތް ދެ ބޯޓު މާލެ ސަރަޙައްދަށް އައުމުން ބަންކަރިން ޚިދުމަތް ހުއްޓިފައިވާ ކަމަށް ބުނެ، ބައެއް މީޑިއާތަކުން ފަތުރަމުން އަންނަ ޚަބަރުތަކާއި ގުޅިގެންނެވެ.
ޝިމާދު ވިދާޅުވީ "މެރިން ބެލާ" މާލެ ކައިރިއަށް އައީ އޯޑަރަކަށް ތެޔޮ ޑެލިވެރީ ކޮށްދިނުމަށެވެ. އަދި "މެރިން އެންޖެލްސް" އުޅަނދު މާލެ ސަރަޙައްދަށް އައީ ރޫޓިންކޮށް ކުރަން ޖެހޭ މަރާމާތެއް ކުރުމަށް ކަމަށް ޝިމާދު ވިދާޅުވިއެވެ.
އިހަވަންދިއްޕޮޅުގައި މަރާމާތުކުރުމަށް ބޭނުންވާ ވޯކްޝޮޕުތައް ނެތުމުން މާލެ ސަރަޙައްދަށް ރޫޓިން މަރާމާތަކަށް އެ ބޯޓު އަންނަން ޖެހުނު ކަމަށް ޝިމާދު ވިދާޅުވިއެވެ.
ބަންކަރިން ޚިދުމަތް ނުހުއްޓި ކުރިއަށްދާ ކަމަށާއި މިފަދަ މުހިއްމު އިންވެސްޓުމެންޓުތަކާއި ގުޅޭ ޚަބަރުތައް ގެނައުމުގައި ވިސްނުންތެރިކަން އިސްކުރުމަށް ޝިމާދު ގޮވާލެއްވިއެވެ. އަދި ބަންކަރިން ޚިދުމަތާއި ގުޅިގެން އާ މަޢުލޫމާތުތަކެއް ކުރިއަށް އޮތް ކަމަށް ވެސް ޝިމާދު ހާމަކުރެއްވިއެވެ.
އިހަވަންދިއްޕޮޅުގައި ބައިނަލްއަޤްވާމީ ބަންކަރިންގެ ޚިދުމަތް ފެށުމަށް އެސްޓީއޯ އިން 15-20 މިލިއަން ޑޮލަރާ ދެމެދުގެ ޢަދަދެއް އިންވެސްޓްކޮށްފައިވެއެވެ. މި ޚިދުމަތް ފަށާފައިވަނީ ބައިނަލްއަޤްވާމީ ކުންފުންޏެއްކަމަށްވާ ވިޓޯލްއާއި ގުޅިގެންނެވެ.
ބަންކަރިން ޚިދުމަތް އިތުރަށް ފުޅާކޮށް ހޯރަފުށީގައި ތެޔޮ ޓާމިނަލަކާއި ކޮންޓެއިނާ ޓާމިނަލެއް އެޅުމަށް ހަމަޖެހިފައިވާ އިރު، ހއ. އުލިގަމުގައި ޔޮޓް މެރީނާއެއް ތަރައްގީ ކުރުމަށް ހަ ފަރާތަކުން މިހާރު ވަނީ ޝައުގުވެރިކަން ފާޅުކޮށްފައެވެ.
