މާފުށީ ޖަލުގެ ގޮޅިއެއް ކްލަބެއް ގޮތަށް ދިއްލާފައިވާ މަންޒަރު ފެންނަ ވީޑިއޯއެއް މީސް މީޑިއާގައި ބަޔަކު މިހާރު ދައުރު ކުރަމުން ދިޔަ ނަމަވެސް އެއީ ކުރީގެ ވީޑިއޯއެއް ކަމަށް މޯލްޑިވްސް ކަރެކްޝަނަލް ސާވިސް އިން މިއަދު ބުނެފިއެވެ.
މީސް މީޑިއާގައި މިހާރު ދައުރުވަމުންދާ ވީޑިއޯއިން ފެންނަ ގޮތުގައި ޖަލު ގޮޅިތެރޭގައި އެކި ކުލައިގެ ބޮކިތަކުން ވަނީ ދިއްލާލައިފައެވެ. އަދި ފާރުގައި ޑިޒައިން ކޮށް، ގޮޅި ތެރޭގައި އެކި ފަރުނީޗަރުތައް ވެސް ބަހައްޓާފައި ހުންނަތަން އެ ވީޑިއޯއިން ފެނެއެވެ. މީގެ އިތުރުން އެގޮޅީގައި މީހުން އުޅޭތަން ވެސް ފެނެއެވެ.
އެކަމާއި ގުޅިގެން ކަރެކްޝަނުން މިއަދު ނެރުނު ނޫސް ބަޔާނެއްގައި ބުނީ މީސް މީޑިއާގައި މިހާރު ދައުރުވަމުންދާ ވީޑިއޯއަކީ އެ ސާވިސް އިން ބެލިބެލުމުން 2022 ވަނަ އަހަރުން ފެށިގެން އެކި ފަހަރު މަތިން ދައުރުވަމުންދާ ވީޑިއޯއެކެވެ.
Advertisement
އަދި ޤައުމީ ސަލާމަތާއި ގުޅުން ހުންނަ މިފަދަ މުއައްސަސާއަކާއި ބެހޭގޮތުން މަޢުލޫމާތު ފެތުރުމުގެ ކުރިން އެކަމެއްގެ މައުލޫމާތު އެ މުއައްސަސާއަށް ގުޅުއްވައިގެން ހޯއްދެވުމަށް ކަރެކްޝަނަލް ސާވިސްއިން ވަނީ ޢާންމުންނަށް އިލްތިމާސްކޮށްފައެވެ.
