ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް، ލ. މާމެންދޫ ކައިރީގައި އޮންނަ ހުޅިމެންދޫގައި 5 ތަރީގެ ޓްރެއިނިންގ ރިސޯޓެއް ތަރައްޤީކުރުމަށް މިއަދު ޤައުމީ ޔުނިވަރސިޓީއާއެކު ފަހުމުނާމާއެއްގައި ސޮއިކޮށްފިއެވެ.

ޤައުމީ ޔުނިވަރސިޓީގައި ބޭއްވުނު ރަސްމިއްޔާތުގައި މި ފަހުމުނާމާގައި ފަތުރުވެރިކަމާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރު އިބްރާހީމް ފައިޞަލެވެ. އަދި މޯލްޑިވްސް ނެޝަނަލް ޔުނިވަރސިޓީގެ ފަރާތުން ސޮއިކުރެއްވީ އެމްއެންޔޫގެ ވައިސް ޗާންސެލަރ ޑރ. އާއިޝަތު ޝެހެނާޒް އާދަމެވެ.

މި ރަސްމިއްޔާތުގައި ވާހަކަފުޅު ދައްކަވަމުން ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވީ، މިއީ ފަތުރުވެރިކަމުގެ ދާއިރާއިން ކުރިއަށް ދާން ބޭނުންވާ އަދި ދާއިރާގައި ގިނަ އަހަރު ތަޖުރިބާ ލިބިފައިވާ މީހުންނަށް ރަނގަޅު ފުރުޞަތެއް ކަމަށެވެ. އަދި ޓޫރިޒަމް ސިނާއަތުގެ ތެރެއިން ދިވެހިންނަށް މަންފާ އެންމެ ރަނގަޅަށް ލިބޭނެ ގޮތަކަށް މި ސިނާއަތު ބައްޓަންކުރުމަކީ މިއަދު ސަރުކާރުން އެންމެ އިސްކަމެއް ދެއްވާ ކަމެއް ކަމަށް ވަޒީރު ފާހަގަކުރެއްވިއެވެ.

އެމްއެންޔޫގެ ވައިސް ޗާންސެލަރ ޑރ. އާއިޝަތު ޝެހެނާޒް އާދަމް ވިދާޅުވީ، މި މަޝްރޫޢާއެކު ރާއްޖޭގެ ފަތުރުވެރިކަމުގެ ދާއިރާއަށް ބޭނުންވާ ފަންނީ މީހުން އުފެއްދުމަށް ކުރާ މަސައްކަތަށް ބޮޑު ކުރިއެރުމެއް ލިބިގެންދާނެ ކަމަށެވެ. އަދި މި މަޝްރޫޢުގެ މަސައްކަތް ކުރިއަށް ގެންދާއިރު ތިމާވެށި ރައްކާތެރިކުރުމާއި، ވަޒީފާގެ ފުރުޞަތުތައް އިތުރުކުރުމާއި، ދިވެހި ޘަޤާފަތާއި އާދަކާދަތައް ދެމެހެއްޓުމަށް އިސްކަންދޭނެ ކަމަށްވެސް ވައިސް ޗާންސެލަރ އޭނާ ވިދާޅުވިއެވެ.

^{ރައީސުލްޖުމްހޫރިއްޔާގެ ވަޢުދު ފުއްދުމުގެ ގޮތުން ހުޅިމެންދޫގައި ޢިމާރާތްކުރާ 5 ތަރީގެ ޓްރެއިނިންގ ރިސޯޓެއް ތަރައްޤީކުރުމަށް މިއަދު ބޭއްވި ރަސްމިއްޔާތުގައި ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް އަދި މޯލްޑިވްސް ނެޝަނަލް ޔުނިވަރސިޓީގެ ވައިސް ޗާންސެލަރ ޑރ. އާއިޝަތު ޝެހެނާޒް.}

މި މަޝްރޫޢަކީ ދިވެހިރާއްޖޭގެ ފަތުރުވެރިކަމުގެ ދާއިރާގެ ތަޢުލީމީ ފެންވަރު ބައިނަލްއަޤްވާމީ މިންގަނޑުތަކާއި ހަމަކުރާނެ މަޝްރޫޢެއް ކަމަށްވެސް ޑރ. ޝެހެނާޒް ފާހަގަކުރެއްވިއެވެ.

މި ރިސޯޓުގައި ކިޔަވާ ދަރިވަރުންނަށް އަމަލީ ތަޖުރިބާ ހޯދުމުގެ ފުރުޞަތު ލިބިގެންދާނެ ކަމަށް ވަޒީރު އިބްރާހިމް ފައިޞަލް ވިދާޅުވިއެވެ. "ރައީސްގެ ވިސްނުން ހުރި ގޮތުން އަޅުގަނޑުމެން ބޭނުންވަނީ ތަމްރީނު ދޭ ރިސޯޓުގައި ތިބެގެން ކިޔަވާއިރު އެތަނުގައި ކިޔަވާ މީހުން ފަތުރުވެރިންނަށް ޚިދުމަތް ދެމުންވެސް ދާނެ. އަދި އެކި ޑިޕާޓްމަންޓްތަކުގައިވެސް އަމަލީ ގޮތުން މަސައްކަތް ކުރުމުގެ ފުރުޞަތު ލިބިގެންދާނެ," ވަޒީރު ވިދާޅުވިއެވެ.

މީގެ އިތުރުން، ފަތުރުވެރިކަމުގެ ސިނާއަތް ނެތް ރަށްތަކުގައި ވެސް އެ ސިނާއަތް ތަޢާރަފުކޮށް ފުޅާކުރުމުގެ ވިސްނުން ސަރުކާރުގައި ހުރި ކަމަށް ވަޒީރު ފާހަގަކުރެއްވިއެވެ.

މި މަޝްރޫޢަކީ ރާއްޖޭގެ ފަތުރުވެރިކަމުގެ ސިނާއަތަށް އާ ބާރެއް ލިބި، ދާއިރާއަށް ބޭނުންވާ ފަންނީ މީހުން އުފެއްދުމަށް މަގުފަހިވެގެންދާނެ މުހިންމު މަޝްރޫޢެކެވެ.