އޯގަސްޓް މަހު ހިނގި އިޤްތިޞާދީ ހާލަތާ ގުޅޭ މުޒާހަރާތަކާ ގުޅިގެން ހައްޔަރުކޮށް މަރުގެ ޙުކުމް އިއްވުމަށް ދަޢުވާކުރި ނައިޖީރިއާގެ 119 މީހުން ކޯޓުން ދޫކޮށްލައިފިއެވެ. އެމީހުން ދޫކޮށްލީ ދައުލަތުން އެމީހުން މަރަން ކުރި ދަޢުވާ އަނބުރާ ގެންދިއުމާއި ގުޅިގެން ކަމަށް ޚަބަރުތައް ބުނެއެވެ. މީގެ ތެރޭގައި ކުޑަކުދިންވެސް ހިމެނެއެވެ.
ނައިޖީރިއާގައި މަރާލަންވެގެން ދަޢުވާ އުފުލި 18 އަހަރުން ދަށުގެ ހުރިހާ ކުދިން ހިމެނޭހެން ޖުމްލަ 119 މީހުން، ދައުލަތުގެ އެދުމުގެ މަތީން ކޯޓުން ވަނީ ދޫކޮށްލާފައި.
މި މީހުންގެ މައްޗަށް ދަޢުވާ އުފުލާފައިވަނީ ޤައުމަށް ޣައްދާރުވުމާއި ސިފައިންގެ ބަޣާވާތަކަށް ހިތްވަރުދިނުމުގެ ކުށުންނެވެ. މި މީހުން ކޯޓަށް ހާޒިރުކޮށްފައިވަނީ 76 އަދި 43 މީހުންގެ ދެ ގްރޫޕަކަށް ބަހާލައިގެން ވޭތުވެދިޔަ ހުކުރު ދުވަހު ކަމަށާއި، މި ދަޢުވާތަކުގެ ތެރެއިން އެއް ދަޢުވާގެ އަދަބަކީ މަރުގެ އަދަބު ކަމަށް ނައިޖީރިއާގެ ޕްރޮސިކިއުޓަރުން ވިދާޅުުވެއެވެ.
ރައީސް ބޯލާ ޓިނުބު ވަނީ އޯގަސްޓް މަހުގެ މުޒާހަރާތަކާ ގުޅިގެން ހައްޔަރުކޮށްފައިވާ އެންމެހާ ކުޑަކުދިން ދޫކޮށްލުމަށާއި އެ ކުދިންގެ މައްޗަށް އުފުލާފައިވާ ދަޢުވާތައް ދޫކޮށްލުމަށް އަމުރުކުރައްވާފައެވެ.
މުޒާހަރާތެރިންގެ ވަކީލު ދެޖީ އަދެޔާންޖު ރޮއިޓަރޒްއަށް ވިދާޅުވި ގޮތުގައި މައްސަލަ ވަނީ ބާޠިލްކޮށް، 119 މުޒާހަރާތެރިން ދޫކޮށްލާފައެވެ. އަދި މިހާރު އެ މީހުން އަލުން މުޖުތަމަޢަށް އަހުލުވެރިކުރުވުމަށާއި ބަދަލު ހޯދައިދިނުމަށް އެކި ސްޓޭޓްތަކުގެ ސަރުކާރުތަކުގައި އެދެމުންދާ ކަމަށް އޭނާއާއި ޙަވާލާދީ މަސްދަރުތަކުގައި ވެއެވެ.
