ސަރުކާރުން 2025 ވަނަ އަހަރަށް ހުށަހަޅާފައިވާ ދައުލަތުގެ ބަޖެޓުގައި، އަންނަ އަހަރު ރާއްޖެއަށް 2.2 މިލިޔަން ފަތުރުވެރިން ޒިޔާރަތްކުރާނެކަމަށް ލަފާކޮށްފައިވާކަމަށް މިނިސްޓްރީ އޮފް ފިނޭންސުން މިއަދު ހާމަކޮށްފިއެވެ.
މިނިސްޓްރީން ދެއްވި މަޢުލޫމާތުގައިވާ ގޮތުން، އަންނަ އަހަރު ފަތުރުވެރިކަމުގެ ބެޑް ނައިޓްސް 14.2 މިލިޔަނަށް އަރާނެކަމަށް ވެސް ލަފާކުރެވެއެވެ. މިއީ މިއަހަރުގެ އަމާޒަށްވުރެ 2 ލައްކަ އިތުރު އަދަދެކެވެ. މިއަހަރު ސަރުކާރުން އަމާޒު ހިފާފައިވަނީ 2 މިލިޔަން ފަތުރުވެރިން ރާއްޖެއަށް ގެނައުމަށެވެ.
"އަންނަ އަހަރު ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބޭނެކަމަށް އަޅުގަނޑުަޅުގަނޑުމެން އުންމީދުކުރަން. ޚާއްޞަކޮށް އައު ވެލާނާ އިންޓަރނޭޝަނަލް އެއަރޕޯޓު ޓަރމިނަލް ހުޅުވުމާއެކު ރާއްޖެއަށް އަންނަ ފަތުރުވެރިންގެ ޢަދަދު އިތުރުވާނެކަމަށް ބެލެވޭ،" މިނިސްޓްރީގެ ސީނިއަރ އޮފިޝަލެއް ވިދާޅުވިއެވެ.
އައު ވެލާނާ އިންޓަރނޭޝަނަލް އެއަރޕޯޓު ޓަރމިނަލަކީ 78,000 އަކަ މީޓަރުގެ ސަރަހައްދެއްގައި ތަރައްޤީކުރެވޭ، އަހަރަކު 7 މިލިއަން ފަސިންޖަރުންނަށް ޚިދުމަތްދެވޭ ފެންވަރުގެ ޒަމާނީ ވަސީލަތްތަކާ އެކު ތައްޔާރުކުރެވޭ ޓަރމިނަލެކެވެ. މި ޓަރމިނަލްގައި އެއިރޯ ބޯޑިން ބްރިޖްތަކާއި، އެންމެ ފަހުގެ ބެގޭޖް ހޭންޑްލިން ސިސްޓަމްތަކުގެ އިތުރުން ގިނަ އެފް އެންޑް ބީ އައުޓްލެޓްތަކާއި، ރީޓެއިލް ސްޕޭސްތަކާއި، ލައުންޖްތައް ހިމެނޭނެއެވެ..
މި އަމާޒަށް ވާސިލުވުމަށްޓަކައި ސަރުކާރުން ދަނީ އެކި ޤައުމުތަކުގައި ރާއްޖޭގެ ފަތުރުވެރިކަން ޕްރޮމޯޓްކުރުމުގެ މަސައްކަތްތައް ކުރަމުންނެވެ. މީގެ އިތުރުން، އައު މާކެޓްތައް ހޯދުމަށާއި، ރާއްޖޭގެ ފަތުރުވެރިކަމުގެ ދާއިރާގައި އިތުރު އިންވެސްޓްމަންޓްތައް ގެނައުމަށް ވެސް މަސައްކަތްތަކެއް ކުރެވެމުންދާކަމަށް މިނިސްޓްރީ އޮފް ޓޫރިޒަމުން ބުނެއެވެ.
"އަޅުގަނޑުމެން މިހާރު ވަނީ ޗައިނާގެ މާކެޓް އަލުން ހުޅުވާލުމުގެ މަސައްކަތް ފަށާފައި. އަދި މެދުއިރުމަތީގެ ޤައުމުތަކުން ރާއްޖެއަށް އަންނަ ފަތުރުވެރިންގެ ޢަދަދު އިތުރުކުރުމަށް ވެސް ޚާއްޞަ ސަމާލުކަމެއް ދެމުން މިގެންދަނީ،" މިނިސްޓްރީ އޮފް ޓޫރިޒަމްގެ ބަސްބުނާ ފަރާތެއް ވިދާޅުވިއެވެ.
ނަމަވެސް، މި އަމާޒަށް ވާސިލުވުމުގައި ގޮންޖެހުންތަކެއް ހުރިކަން ވެސް ފާހަގަކުރެވެއެވެ. ޚާއްޞަކޮށް ދުނިޔޭގެ އިޤްތިޞާދީ ޙާލަތާއި، ބައިނަލްއަޤްވާމީ ދަތުރުފަތުރުގެ ޚަރަދުތައް މަތިވުމަކީ ގޮންޖެހުމަކަށް ވެދާނެކަމަށް ބެލެވެއެވެ.
"އަޅުގަނޑުމެން މި އަމާޒާ ދިމާއަށް ދާއިރު، ދުނިޔޭގެ އިޤްތިޞާދީ ޙާލަތަށް ވެސް ސަމާލުވާން ޖެހޭ. އަދި ރާއްޖޭގެ ފަތުރުވެރިކަމުގެ ދާއިރާގައި ދެމެހެއްޓެނިވި ގޮތެއްގައި ކުރިއެރުން ހޯދުމަށް މަސައްކަތްކުރަން ޖެހޭ،" މޯލްޑިވްސް ނެޝަނަލް ޔުނިވަރސިޓީގެ ޓޫރިޒަމް ދާއިރާގެ ލެކްޗަރަރއެއް ވިދާޅުވިއެވެ.
