ކޮރެއާގެ މަޝްހޫރު ބޭންޑް ބީޓީއެސްގެ 2026 ވަނަ އަހަރުގެ ކަމްބެކް ނުވެދާނެކަމަށް އެ ބޭންޑުގެ މެނޭޖްމަންޓް ކުންފުނި ހައިބުން ބުނެފިއެވެ.

ބީޓީއެސް ވަނީ 2022 ވަނަ އަހަރު ޑިސްބޭންޑްވެފައެވެ. މިއީ ކޮރެއާގެ ސަޤާފަތުގައި އޮންނަ ގޮތުން 18 އަހަރު ފުރިފައިވާ ކޮންމެ ފިރިހެނަކުވެސް 1 އަހަރާއި 2 އަހަރާ ދެމެދުގެ މުއްދަތަކަށް މިލިޓަރީގައި ޚިދުމަތްކުރަންޖެހުމުގެ ސަބަބުންނެވެ.

މިވަގުތު ބޭންޑުގެ 7 މެންބަރުންގެ ތެރެއިން 2 މެންބަރުން ވަނީ އަނބުރާ އައިސްފައެވެ. ފޭނުން އުންމީދުކުރަނީ މިއަންނަ އަހަރު ބާކީ ތިބި 5 މެންބަރުން އައުމުން ބޭންޑުގެ ކަމްބެކް ފެނިގެންދާނެ ކަމަށެވެ. ނަމަވެސް ހައިބުން މިހާރު ހާމަކޮށްފައިވާ ގޮތުގައި 2026 ވަނަ އަހަރު މި ބޭންޑުގެ ކަމްބެކް ނުވެދާނެއެވެ.

ހައިބުން މިކަން ހާމަކޮށްފައިވަނީ އެ ކުންފުނީގެ ޤަވާޢިދާއި، މިލިޓަރީގެ ޚިދުމަތް ފުރިހަމަކުރުމަށްފަހު އަނބުރާ އަންނަ މެންބަރުންނަށް އަމިއްލަ ވަގުތު ދިނުމުގެ ގޮތުންނެވެ. ނަމަވެސް އަދި ވަކި ގޮތެއް ޔަޤީންނުވާކަމަށްވެސް ބުނެފައިވެއެވެ.

ބީޓީއެސްއަށް މިހާރު ވަނީ 11 އަހަރު ފުރިފައެވެ. މި ދުވަސް ފާހަގަކުރުމަށް ޖިން ފިޔަވައި އެހެން މެންބަރުންނަށް ނާދެވުނު ނަމަވެސް، ކޮންމެ މެންބަރަކުވެސް ވަނީ އާމީއަށް އަމިއްލައަތުން ލިޔެފައިވާ ސިޓީތަކެއް ޙިއްސާކޮށްފައެވެ. މި ސިޓީތަކުގައި ކޮންމެ މެންބަރަކުވެސް އެ މީހެއްގެ ހާލަތު ބަޔާންކޮށްދީ، ހިތުގެ ޝުޢޫރު ޙިއްސާކޮށް، އަދި އެމީހުން އަނބުރާ އައުމަށް އިންތިޒާރުކުރުމަށް އެދިފައިވެއެވެ.