ހަތަރު ފުރޮޅުލީ އުޅަނދެއް ރަޖިސްޓްރީ ކުރުމުގެ ކުރިން އެ އުޅަނދު ބޭއްވޭނެ ގަރާޖެއް އޮތްކަން ކަށަވަރުކުރަންޖެހޭގޮތަށް އެއްގަމުގައި ދުއްވާ އިންޖީނުލީ އުޅަނދު ރަޖިސްޓަރީކުރުމުގެ ޤަވާއިދު އިޞްލާހުކޮށްފިއެވެ.

ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން އަލަށް އެކުލަވާލި ޤަވާޢިދުގައިވާގޮތުން، ދެ ފުރޮޅަށްވުރެ ގިނަ ފުރޮޅުލީ އުޅަނދު ބޭއްވޭނެ ޖާގަ އޮތްކަން ވުޒާރާއިން ނުވަތަ ވުޒާރާއިން ކަނޑައަޅާ ފަރާތަކުން ބަލައި ކަށަވަރު ކުރަންވާނެކަމަށް ބަޔާންކޮށްފައިވެއެވެ.

މީގެކުރިން ޤަވާޢިދު އޮތީ ދެފުރޮޅަށްވުރެ ގިނަ ފުރޮޅުލީ އުޅަނދެއް ރަޖިސްޓްރީ ކުރުމަށް ގަރާޖެއް އޮތްކަމުގެ ލިޔުމާއި، ގަރާޖުގެ ވެރިފަރާތުގެ އިޢުތިރާޒެއް ނެތްކަމުގެ ލިޔުމެއް ދެއްކުމަށެވެ. އަދި އެ ގަރާޖަކީ ރަޖިސްޓްރީކޮށްފައިވާ ގަރާޖެއްކަން އެނގޭނެ ލިޔުންތައް ހުށަހަޅަން ޖެހުނު ނަމަވެސް އޭރު އެ ގަރާޖުގައި އުޅަނދު ބޭއްވޭނެ ޖާގަ އޮތްކަން ވުޒާރާއިން ކަށަވަރުކުރާކަށް ނުޖެހެއެވެ.

ގަރާޖެއްނެތި އެތެރެކުރާ އުޅަނދުތަކުގެ ސަބަބުން މިހާރުވެސް މާލޭގެ ޕާކިންއަށް ބޮޑެތި މައްސަލަތަކެއް ކުރިމަތިވެފައިވާއިރު، މި މައްސަލައަށް ދާއިމީ ހައްލެއް ހޯދުމަށް ސަރުކާރުން މަސައްކަތްތަކެއް ކުރަމުންނެވެ. މިގޮތުން މާލެ ސިޓީ އާއި އެޗްޑީސީގެ ދަށުން ގަރާޖުގެ ގޮތުގައި ރަޖިސްޓްރީ ކުރެވޭ ޖާގަތަކާއި، އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ދަށުން ވިޔަފާރިއާއި ގުދަނުގެ ގޮތުގައި ރަޖިސްޓްރީ ކުރެވޭ ތަންތަން އެއްވިއުގައަކުން ގުޅާލުމަށް ވަނީ ނިންމާފައެވެ.

މި ވިއުގައިގައި އަމިއްލަ ފަރާތްތަކުގެ ގަރާޖުތަކާއި، ސަރުކާރުގެ ޕާކިން ބިލްޑިންތަކާއި އަދި އެހެނިހެން ގަރާޖުތައްވެސް ހިމެނޭނެ ކަމަށާއި މިއާއެކު ހައްލު ނުވެ އޮތް މި މައްސަލައަށް ދާއިމީ ހައްލު ލިބިގެންދާނެކަމަށް ސަރުކާރުން ހާމަކުރިއެވެ.