ދިވެހިރާއްޖޭގެ ފެތުންތެރިޔާ ޙަމްނާ އަޙްމަދު ވަނީ އަންހެނުންގެ ޝޯޓްކޯސް 100 މީޓަރ އަދި 50 މީޓަރ ބްރެސްޓްސްޓްރޯކް އިވެންޓުގެ ޤައުމީ ރެކޯޑު އާކޮށްފައެވެ. މި ދެ ރެކޯޑު އާކުރީ ހަންގޭރީގައި ކުރިއަށްދިޔަ ހާޖޮސް އަލްފްރެޑް ކުޕާ 3 ގައެވެ.
100 މީޓަރ ބްރެސްޓްސްޓްރޯކް އިވެންޓުގައި ޙަމްނާ ވަނީ 01:23.76 ގައި ރޭސް ނިންމައިފައެވެ. މިއީ 2019 ވަނަ އަހަރު އައިޝަތު ސާޖިނާ ސައުތު އޭޝިއަން ގޭމްސްގައި ރާއްޖެއަށް ހޯދައިދިން ރެކޯޑަށްވުރެ 0.05 ސިކުންތު އަވަހެވެ.
50 މީޓަރ ބްރެސްޓްސްޓްރޯކް އިވެންޓުގައި ޙަމްނާ ވަނީ 00:37.13 ގައި ރޭސް ނިންމައިފައެވެ. މިއީ މިދިޔަ އަހަރު ޙަމްނާ އަމިއްލައަށް ހޯދި ރެކޯޑަށްވުރެ 0.75 ސިކުންތު އަވަހެވެ.
މި ނަތީޖާތަކާއެކު ޙަމްނާ ވަނީ ކުރިއަށް އޮތް ބައިނަލްއަޤްވާމީ މުބާރާތްތަކުގައި ރާއްޖެއަށް އިތުރު ކާމިޔާބީތަކެއް ހޯދައިދޭނެކަމުގެ އުންމީދު އާކޮށްދީފައެވެ.
