ރާއްޖެއިން ސަޢުދީ ޢަރަބިއްޔާއަށް ކަނޑައަޅުއްވާފައިވާ ސަފީރު އަޙްމަދު ސަރީރު އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދާއި ބައްދަލުކުރައްވައިފިއެވެ.

އިސްލާމިކް މިނިސްޓްރީގައި މިއަދު ކުރިއަށްދިޔަ މި ބައްދަލުކުރެއްވުމުގައި މިނިސްޓަރ ޝަހީމް ވަނީ ސަފީރަށް މަރުޙަބާ ދަންނަވާ ދެ ފަރާތުން ގުޅިގެން ކުރެވިދާނެ އެކި ކަންކަމާއި ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައެވެ.

ސަޢުދީ ސަފީރުގެ މަޤާމަށް އައްޔަންކުރައްވާފައިވާ އަޙްމަދު ސަރީރު އެންމެ ފަހުން ހުންނެވީ އޯގަނައިޒޭޝަން އިފް އިސްލާމިކް ކޮންފަރެންސް، އޯއައިސީގެ ޑިރެކްޓަރ އޮފް އޭޝިއަން އެފެއަރސްގެ މަޤާމުގައިކަން ފާހަގަކޮށްލެވެއެވެ. އޭނާ ވަނީ މީގެ ކުރިން ދިވެހި ޚާރިޖިއްޔާގެ އެމްބެސެޑަރ އެޓްލާޖުގެ މަޤާމުވެސް އަދާކުރައްވާފައެވެ.

މީގެ އިތުރުން ސަރީރު ވަނީ ބަންގްލަދޭޝް، އދ. އަދި އެމެރިކާއަށް ކަނޑައަޅާފައި ހުންނަވާ ރާއްޖޭގެ ސަފީރުކަމުގެ މަޤާމުތައް ވެސް ފުރުއްވާފައެވެ.