ޑރ. ޝަޒްރާ އިބްރާހީމް އާއި އިޔާޒްގެ އަނބިކަނބަލުން އައިޝަތު ޝާދިޔާގެ މައްޗަށް އެކަށީގެން ނުވާ ވަރަށް އަޑުގަދަކުރުމުގެ ކުށުގެ ދަޢުވާއާއި ދައުލަތުގެ އެހެނިހެން މަސައްކަތްތަކަށް ހުރަސްއެޅުމުގެ ކުށުގެ ދައުވާ އުފުލައިފިއެވެ. 

އެ ދެމީހުންނަށް ދަޢުވާ ކުރަނީ ފަލަސްޠީނުގައި ހިނގާ ހަނގުރާމައާއި ގުޅިގެން މާލޭގައި ސިޔާސީ ގޮތުން ބޭއްވި މުޒާހަރާތަކުގެ ތެރެއިން އެމްބަސީތައް ކައިރީގައި ޤާނޫނާއި ޚިލާފަށް ޢަމަލުކޮށް ސަފީރުންނަށް އުނދަގޫކުރި މައްސަލަ ތަޙުޤީޤު ކުރުމަށްފަހުގައެވެ.

^{ޑރ. އިޔާޒުގެ އަނބިކަނބަލުން އައިޝަތު ޝާދިޔާ އާއި ޑރ. ޝަޒްރާ އެންމެ ފުރަތަމަ ބައްދަލުވީ ރައްޔިތުންގެ މަޖިލިސް ކައިރީގައި އޮތް މުޒާހަރާއަކުން. ޚިޔާލު ފާޅުކުރުމާއި އެއްވެ އުޅުމުގެ މިނިވަންކަން ނުބައިކޮށް މާނަކޮށް ނާޖާއިޒު ސިޔާސީ މަންފާތަކެއް ޙާޞިލް ކުރުމަށްޓަކައި ދިވެހި ސަރުކާރަށް ޖެއްސުން ކުރުމުގެނިޔަތުގައި ބޭރުގެ އެމްބަސީތައް ކައިރީ އަޑުގަދަކޮށް ސަފީރުންނަށް އުނދަގޫކޮށް މަސައްކަތްތަކަށް ހުރަސް އެޅުމަކީ އެއްވެސް ބަޔަކު ކޮށްގެން ވާނެ ކަމެއް ނޫން. / ފޮޓޯ: ސޯޝަލް މީޑިއާ}

ޑރ. އިޔާޒްގެ އަނބިކަނބަލުން ޝާދިޔާ އާއި ޑރ. ޝަޒްރާ އިބްރާހިމްގެ މައްސަލައިގައި ދަޢުވާ ކުރުމާމެދު ހުސްވި ހަފްތާގައި ގޮތެއް ނިންމާނެ ކަމަށް ޕްރޮސެކިއުޓަރ ޖެނެރަލްގެ އޮފީހުން މީގެ ކުރިން ވަނީ ބުނެފައެވެ.

ސެޕްޓެމްބަރު މަހު، ސަޢޫދީ އެމްބަސީ ކައިރީގައި މުޒާހަރާކުރަނިކޮށް ފުލުހުން މި ދެމީހުން ހައްޔަރުކުރީ ސުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނާއި ޚިލާފަށް، ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުޢާމަލާތްކުރުމުގެ ސަބަބުން ކަމަށް ޚުލާސާއިން އޭރު ކުރިސުވާލަކަށް ޖަވާބު ދެއްވަމުން ޕޮލިސް މީޑިއާ އޮފިޝަލް ވިދާޅުވިއެވެ.

ސިޔާސީ ބޭނުމެއްގައި ޤާނޫނީ ސަރުކާރަށް ޕްރެޝަރު ކުރުމަށްޓަކައި ބޭރުގެ އެމްބަސީތައް ކައިރިޔަށް އެއްވެ ޞުލްޙަވެރި މުޒާހަރާތަކުގެ އުޞޫލުތަކާއި މުޅިން ޚިލާފަށް މި ދެމީހުން ޢަމަލުކޮށްފައިވާ ކަމަށް ބައެއް ފަރާތްތަކުން ތުހުމަތުކުރާއިރު އެމީހުން ކުރި ކަންތައް ދިފާޢުކުރާ ބަޔަކު ވެސް އުޅެއެވެ.

އެމްބަސީތައް ކައިރީގައި މުޒާހަރާކޮށް ދައުލަތުގެ މަސައްކަތްތަކަށް ހުރަސް އެޅި މައްސަލައިގައި ކްރިމިނަލް ކޯޓުން ވަނީ ދެ ފަހަރެއްގެ މަތިން މި ދެމީހުންގެ ބަންދުގެ މުއްދަތު މީގެ ކުރިން އިތުރުކޮށްދީފައެވެ. ނަމަވެސް، ހައިކޯޓުން ފަހުން ވަނީ އިޔާޒްގެ އަނބިކަނބަލުން އިސްތިއުނާފްކުރި މައްސަލައިގައި ކްރިމިނަލް ކޯޓުން ޖެހި ބަންދުގެ މުއްދަތު ނިމުމަކަށް ގެނެސްދީފައެވެ. އޭގެފަހުން ދައުލަތުން މިމައްސަލަ ސުޕްރީމް ކޯޓަށް ހުށަހެޅި ނަމަވެސް، އެ ކޯޓުން ވަނީ މައްސަލަ ބަލައިނުގަނެ އަނބުރާ ފޮނުވާލާފައެވެ.